BUU Bas Assambleıasy Qazaqstannyń bastamasyn qoldap, 22 sáýirdi Halyqaralyq kógaldandyrý kúni dep jarıalady, dep habarlaıdy infohub.kz.
Ekologıa jáne tabıǵı resýrstar mınıstrliginiń baspasóz qyzmetiniń málimetinshe, BUU Bas Assambleıasy Qazaqstan usynǵan rezolúsıany qabyldap, 22 sáýirdi Halyqaralyq kógaldandyrý kúni dep jarıalady. Atap ótilgendeı, Halyqaralyq kúndi belgileý týraly bastamany Qazaqstan Prezıdenti Qasym-Jomart Toqaev 2025 jylǵy qyrkúıekte BUU Bas Assambleıasynyń 80-shi sesıasynyń jalpy debattary barysynda kótergen. Rezolúsıanyń teń avtorlary 32 memleket boldy.
"Rezolúsıanyń qabyldanýy Qazaqstannyń jahandyq ekologıalyq kún tártibin ilgeriletýge, qorshaǵan ortany qorǵaý, ekojúıelerdi qalpyna keltirý, jasyl jelekterdi keńeıtý jáne ekologıalyq mádenıetti qalyptastyrý jónindegi halyqaralyq kúsh-jigerdi biriktirýge qosqan turaqty úlesin kórsetedi", - dep qosty mınıstrlikte.
Vedomstvonyń aıtýynsha, qujat álemdik qoǵamdastyqtyń kógaldandyrý men tabıǵı ekojúıelerdi qalpyna keltirýdiń mańyzdylyǵy týraly habardarlyǵyn arttyrýǵa, sondaı-aq memleketterdi, BUU júıesin, halyqaralyq jáne aımaqtyq uıymdardy, azamattyq qoǵamdy jáne basqa da múddeli taraptardy tıisti is-sharalar men bastamalar ótkizýge yntalandyrýǵa baǵyttalǵan.