Bokstan Olımpıada chempıony Danıar Eleýsinov alǵash ret аlkogólge táýeldilikpen kúresi týraly ashyq aıtyp, jankúıerlerge úndeý jasady, dep habarlaıdy infohub.kz.
Sportshy Instagram-daǵy paraqshasynda Olımpıada oıyndarynan keıin ishimdikke áýestik paıda bolǵanyn, onyń ýaqyt óte kele aýrýǵa aınalǵanyn moıyndady. «Qazir bári meni synap jatyr: mas kúıinde jol apatyna tústim, taǵy basqa. Iá, moıyndaımyn, Olımpıadadan keıin аlkogólge áýestik paıda boldy, alkogolızmge beıimdilik, ishimdikke qumarlyq. Onyń aýrýǵa aınalǵanyn qalaı bolǵanyn bilmeımin. Biraq bul kúletin nárse emes. Qazir adamdar kúledi, ártúrli sóz aıtady. Bul olardyń óz basynan ótkenshe túsinbeıdi. Men de jas kezimde kúlgenmin. Biraq mundaı jaǵdaı kúlgen adamnyń ózine de keledi. Men kúresip jatyrmyn», — dedi Eleýsinov.
Onyń aıtýynsha, аlkogól máselesi ol úshin jańa synaqqa aınaldy jáne ol otandastaryn ony aıyptamaýǵa shaqyrdy. «Keıbir adamdar óz problemalary týraly adal aıta almaıdy. Qazir basqa ýaqyt — problemalaryń týraly shynaıy aıtý kerek. Bárimizde bári keremet degen bolmaıdy, juldyzdarda da bári birdeı emes. Biz de adambyz. Eshkim kemel emes. Meniń de qıyndyqtarym, problemalarym bar. Bir aı ońaltý ortalyǵynda jattym. Mysaly, ýaqytsha ustaý ızolátorynda otyrdym. Óz kinámnen. Oǵan deıin men jaqsy jigit edim», — dep qosty boksshy.
Eleýsinov qazir ony «maskúnem jáne alkogolık» dep ataıtynyn, biraq bul sózdermen daýlaspaıtynyn da moıyndady. «Iá, sonda qalaı? Maskúnem, alkogolık. Biraq soǵan qaramastan men Olımpıada chempıony, álem chempıony, kásipqoılar arasynda álem chempıony bolyp qaldym. Ári qaraı óz isimdi jalǵastyryp jatyrmyn. Men aqtalyp jatqan joqpyn. Múmkin, men eń jaqsy emespin. Men Golovkınnen de, Shúmenovten de, Jaqıanovtan da jaqsy emespin. Men jaqsy bolýǵa tyryspaımyn. Iá, buryn jaqsy bolǵym keldi, bul týraly aıtqanmyn. Bári meni tákappar dep oılaıdy. Biraq olaı emes», — dedi Danıar.
Ol endi bári oıdaǵydaı bolatynyn, mansabyn jalǵastyrý úshin AQSH-qa kelgenin aıtty. Eleýsinov jankúıerlerdi ony qoldaýǵa shaqyrdy.
Eske salaıyq, shilde aıynyń basynda Danıar Eleýsinov tutqyndalyp, júrgizýshi kýáliginen aıyrylǵan bolatyn. Elorda polısıasy onyń jol apatynan keıin ustalǵan sátin kórsetetin beınejazbany da jarıalady. Sonymen qatar, shilde aıynyń sońynda Qaraǵandyda eki jergilikti turǵyndy uryp-soǵý isi boıynsha úkim shyǵarylyp, Danıar Eleýsinovtiń áıeli kináli dep tanyldy.