Qazaqstandyq shabýylshy Dastan Satpaev jerlesterine qoldaý kórsetkeni úshin alǵys bildirdi. Onyń suhbaty «Bernlı» klýbynyń YouTube-arnasynda jarıalandy.
«Qaırat» túlegi maýsym aıynda almatylyq klýbtan ketip, aǵylshyndyq «Chelsıge» aýysqan edi. Ol londondyqtar sapynda maýsym aldyndaǵy daıyndyqtan ótip, keıin bir jyldyq jaldaý negizinde «Bernlıge» jiberildi.
Eki klýbtyń da áleýmettik jelilerinde qazaqstandyq jankúıerler Satpaevty belsendi qoldady. «Bernlı» baspasóz qyzmetine bergen suhbatynda 18 jastaǵy fýtbolshy olarǵa arnap jyly lebizin jetkizdi.
«Mundaı qoldaý úshin úlken rahmet! „Chelsıde“ maýsym aldyndaǵy daıyndyqtan ótip júrgenimde, olar ár oıynda, ár jazbanyń astynda meni qoldap otyrdy. Meniń osyndaı tamasha adamdarym bar ekenine qýanyshtymyn. Men olardy jaqsy kóremin, óıtkeni bul — meniń elim. Solar úshin men eýropalyq fýtbolǵa laıyqty ekenimizdi dáleldeıtin bolamyn», — dedi Satpaev.
Ol «Bernlı» jankúıerleriniń de qoldaýyn sezinetinin atap ótti. Fýtbolshy komandaǵa Chempıonshıpten Anglıa Premer-lıgasyna qaıta oralýǵa kómektespek.
«Meniń aýysýyma jankúıerlerdiń qýanyshty ekenine óte rızamyn. Endi olarǵa jáne ózime klýbtyń Premer-lıgaǵa qaıta oralýyna kómektese alatynymdy dáleldeýim kerek. Men muny jasaımyn», — dedi Satpaev.
Qazaqstandyq oıynshy ázirge «Bernlı» sapynda alańǵa shyqqan joq. Bul 23 tamyzda, komanda Chempıonshıptiń ekinshi týrynda «Vest Bromvıchpen» qonaqta oınaǵanda oryn alýy múmkin. Mach Astana ýaqytymen saǵat 16:00-de bastalady.
«Men bul sátti asyǵa kútemin. Eń jaqsy jattyǵý — bul oıyn dep oılaımyn. Fýtbolshylar bir apta boıy dál osy machty kútedi. Men de debútimdi kútip júrmin. Biz úsh upaı alýǵa tyrysamyz. Jankúıerlerimizdiń qoldaýymen jeńiske jetetinimizge senimdimin», — dep atap ótti Satpaev.
Chempıonshıptiń birinshi týrynda qazaqstandyq oıynshy «Bernlı» ótinimine enbedi. Onsyz komanda 0:2 esebinen qalpyna kelip, «Vest Hemmen» machta 2:2 esebimen teń oınady.