Ulybrıtanıanyń Meteorologıalyq qyzmeti (Met Office) Irlandıanyń Met Éireann jáne Nıderlandtyń KNMI uıymdarymen birlesip, 2026-2027 jyldardaǵy maýsymǵa arnalǵan daýyl ataýlarynyń tizimin jarıalady. Bul týraly infohub.kz saıty habarlaıdy.
Tizimge Austen, Boelo jáne Chloe sıaqty ataýlar engen. Barlyǵy 40 myńnan astam usynys túsken. Halyq óz usynystaryn súıikti labrador kúshiginiń qurmetine, meteorologıa salasynyń pıonerlerine jáne «Ýolles jáne Gromıt» múltfılminiń keıipkeri Qoı Shonǵa arnap jibergen.
Met Office mamandary daýyldarǵa at qoıýdyń mańyzdylyǵyn atap ótti: bul adamdardyń aýa raıynyń qaýipti qubylystaryna nazar aýdaryp, daıyndyq jasaýyna jáne qaýipsizdik sharalaryn qabyldaýyna kómektesedi.
Uıymdar 2015 jyldan beri daýyldarǵa at qoıyp keledi. Tizim qyrkúıek aıynyń basynan kelesi jyldyń tamyzyna deıin qoldanylady. Bul meteorologıalyq kúzdiń bastalýymen tuspa-tus keledi, óıtkeni dál osy kezeńde tómen qysymdy aımaqtar men qatty daýyldardyń yqtımaldyǵy artady.
Ótken jyly tizimnen tórt ataý qoldanyldy, onyń ishinde 1 sáýirde bolǵan Storm Dave. Sonymen qatar, Ulybrıtanıaǵa basqa eýropalyq meteorologıalyq qyzmetter ataǵan Benjamin, Claudia jáne Goretti daýyldary da áser etti.
Bıylǵy tizimdegi úshinshi ataý — Chloe. Ony Met Office 120-dan astam ret usynylǵandyqtan tańdaǵan. Bul ataýdy bes jasar aýa raıy áýesqoıynyń anasy usynǵan. Onyń aıtýynsha, qyzy aýa raıyna «qatty qyzyǵady», al sharshaǵan kezde «ózi de daýyl týdyra alady».
Finn ataýy eki jasar ul balaǵa arnalyp usynylǵan, onyń otbasy ony «jabaıy jáne esepsiz kúsh» dep sıpattaıdy. Ivy ataýy toǵyz aılyq labrador kúshiginiń qurmetine qoıylǵan, ony «naǵyz buzýshy» dep ataıdy.
Sondaı-aq, Qoı Shon da tizimge endi. Bul ataý brıtandyq Aardman anımasıalyq stýdıasymen birlesken jumys aıasynda ótken halyq daýys berýiniń nátıjesinde tańdaldy.
Met Office-tiń eskertýler jáne nusqaýlyqtar bóliminiń basshysy Holı Klements: «On jyldan astam ýaqyt boıy daýyldarǵa at qoıý bizge aýa raıynyń qaýipti qubylystary týraly táýekelderdi tıimdirek jetkizýge kómektesip keledi. Aty bar daýyl boljamdar men eskertýlerge naqty baǵyt beredi, bul adamdarǵa áserdi túsinýge jáne ózderin, otbasylary men múlkin qorǵaý úshin sharalar qabyldaýǵa kómektesedi», — dedi.
Daýyldarǵa at Ulybrıtanıa, Irlandıa nemese Nıderland aýmaǵynda ortasha nemese joǵary áser etý yqtımaldyǵy joǵary bolǵan jaǵdaıda beriledi. Negizgi nazar jelge aýdarylady, biraq jańbyr nemese qar sıaqty qosymsha faktorlar da eskeriledi.
Bıylǵy tizimdegi ataýlar men olardy usynǵan elder:
Austen — Irlandıa, Boelo (Bý-lo) — Nıderland, Chloe — Ulybrıtanıa, Dano (Da-no) — Nıderland, Evelyn — Irlandıa, Finn — Ulybrıtanıa, Gwendolyn — Nıderland, Heather — Irlandıa, Ivy — Ulybrıtanıa, Jade — Nıderland, Kilian — Irlandıa, Laoise (Lı-sha) — Irlandıa, Miriam — Irlandıa, Nicola — Ulybrıtanıa, Olaf — Nıderland, Phelim — Irlandıa, Ruban — Ulybrıtanıa, Shaun — Ulybrıtanıa, Theo — Ulybrıtanıa, Vesna (Vehs-ný) — Nıderland, Wende (Ven-dý) — Nıderland.