25 jyldan keıin Qazaqstan «demografıalyq qartaıý» eline aınalýy múmkin: boljam boıynsha, árbir besinshi turǵyn 60 jastan asqan bolady, dep habarlaıdy infohub.kz saıty.
Biryńǵaı jınaqtaýshy zeınetaqy qory (BJZQ) BUU derekterine negizdelgen demografıalyq boljamdardy jarıalady. Statısıkaǵa sáıkes, 2025 jylǵy 1 qańtardaǵy jaǵdaı boıynsha Qazaqstan halqy 20,5 mıllıon adamdy qurady. Onyń 47,5%-y (9,73 mıllıon) 25 pen 65 jas aralyǵynda bolsa, 9,6%-y (1,9 mıllıon) 65 jastan asqan. 2050 jylǵa qaraı halyq sany 26,5 mıllıon adamǵa deıin ósedi dep kútilýde.
Ómir súrý uzaqtyǵynyń artýy men týý kórsetkishiniń tómendeýi egde jastaǵy azamattar úlesiniń ósýine jáne eńbekke jaramdy halyqtyń zeınetkerlerge qatynasynyń tómendeýine ákeledi. BUU men BJZQ boljamdary boıynsha, 2050 jylǵa qaraı 60 jastan asqan qazaqstandyqtardyń úlesi 18,8%-ǵa jetedi, bul halyqaralyq jikteme boıynsha «demografıalyq qartaıýdyń óte joǵary deńgeıine» sáıkes keledi.
Jumys isteıtinderge júkteme de artady: eger 2025 jyly 65 jastan asqan bir adamǵa 4,95 eńbekke jaramdy azamat kelse, 2050 jyly bul kórsetkish 3,42-ge deıin tómendeıdi. Osylaısha, júkteme 1,4 eseden astam artady.
BJZQ mundaı jaǵdaıda jınaqtaýshy zeınetaqy júıesiniń mańyzy artatynyn atap ótedi. Bul júıe bolashaq zeınetaqyny qyzmetker men jumys berýshiniń jarnalary esebinen qalyptastyrady, búdjetke uzaq merzimdi mindettemeler júktemeıdi jáne zeınetaqy júıesiniń turaqtylyǵyn qamtamasyz etedi.
Buǵan deıin zeınetaqy anýıtetin paıdalanyp, eń tómengi jetkiliktilik shegin nólge deıin tómendetip, keıin jınaqtaryn alyp jatqan qazaqstandyqtar bolashaqta tabystarynyń aıtarlyqtaı tómendeýine tap bolýy múmkin ekendigi habarlanǵan bolatyn.