Qazaqstan musylmandary dinı basqarmasy áıelderge qatysty zorlyq-zombylyq oqıǵalarynyń jıileýine baılanysty málimdeme jasady. Uıym ókilderi mundaı faktilerdiń jol berilmeıtinin jáne qatań aıyptalatynyn atap ótti, dep habarlaıdy infohub.kz.
DİMK-tiń Instagram-daǵy resmı paraqshasynda qazaqstandyq qoǵamda bolyp jatqan keıbir oqıǵalar týraly estý aýyr ekendigi aıtylǵan. Ásirese, áıeldiń óz otbasynda zardap shegip, zorlyq-zombylyqqa ushyraýy qynjyltady.
«Áıel — otbasy oshaǵynyń saqshysy. Bireý úshin ol súıikti qyz, bireý úshin — qymbatty ana, bireý úshin — súıikti jar. Ol qorǵan men jylý izdeıdi. Sondyqtan er adamnyń mindeti — oǵan qamqor bolý. Bizdiń ardaqty Paıǵambarymyz Muhammed: «Senderdiń eń jaqsylaryń — otbasyna eń jaqsy qaraıtyndaryń», — degen. Bul sózderde tereń maǵyna jatyr. Er adamnyń kúshi — judyryǵynda emes. Shynaıy kúsh — jaqynyna tirek bolýda, onyń kóz jasyna sebep bolmaýda», — delingen málimdemede.
DİMK-te ashý ústinde kóterilgen qol men ótkir sózder adam júreginde tereń iz qaldyrýy múmkin ekenin atap ótti. «Otbasy — adam ózin barynsha qaýipsiz sezinetin oryn bolýy kerek. Áıel óz úıinde qorqynyshsyz ómir súrýi tıis. Qyzyn súıispenshilikpen ósirip, úlken úmitpen jańa otbasyǵa shyǵaryp salǵan árbir áke men ana bir ǵana nárseni tileıdi — onyń barǵan jerinde baqytty bolýyn. Osy senimdi aqtamaıyq. Áıeldi qorǵaý — er adamnyń paryzy», — dep túıindedi uıym.
Buǵan deıin «Kýrsıv» Jambyl oblysyndaǵy 19 jastaǵy Madına Rashıdqyzynyń qaıǵyly qazasyna qatysty áleýmettik jelilerdegi rezonans basylmaı turǵanyn habarlaǵan. Jaqyndarynyń aıtýynsha jáne Qaznettegi jarıalanymdarǵa sáıkes, qyz turmystyq janjaldan keıin kúıeýiniń qatigez zorlyq-zombylyǵyna ushyraǵan, oǵan sebep bolǵan — jelingen balalar táttisi «Barnı».