Demokratıalyq Kongo Respýblıkasynda Ebola qyzbasynan qaıtys bolǵandar sany artyp keledi — indet eki myńnan astam adamnyń ómirin qıdy, dep habarlaıdy infohub.kz saıty.
El úkimetiniń sársenbige qaraǵan túni jarıalanǵan derekteri boıynsha, aýrýdyń 4 381 jaǵdaıy rastalǵan, onyń 2 011-i ólimmen aıaqtalǵan. Bılik alǵashqy rastalǵan jaǵdaıdan beri ólim-jitim Batys Afrıkadaǵy 2014–2016 jyldardaǵy indet kezindegiden úsh ese jyldam ósip jatqanyn atap ótti. Sol kezdegi indet tarıhtaǵy eń iri dep sanalǵan edi.
Gýmanıtarlyq uıymdar ókilderiniń málimdeýinshe, vırýs taralýy eldiń bes shyǵys provınsıasynda birtindep engizilip jatqan sharalardan áli de ozyp tur.
Dúnıejúzilik densaýlyq saqtaý uıymynyń (DDU) vaksına jónindegi sarapshylary Ebolaǵa qarsy jalǵyz maquldanǵan vaksınanyń adamdarǵa tolyq aýqymdy klınıkalyq synaqtaryn bastaýdy usyndy. Ervebo preparaty zaırlik shtammǵa qarsy qaýipsizdigi men tıimdiligin dáleldegen. Aldyn ala derekterge, onyń ishinde janýarlarǵa júrgizilgen synaqtarǵa sáıkes, Ervebo Kongoda belsendi taralyp jatqan sırek kezdesetin Býndıbýgıo shtammyna qarsy da belgili bir qorǵanys bere alady.
Eske salaıyq, Ebola indetiniń jańa órshýi DKR-da mamyr aıynda tirkelgen edi. Sol kezde bılik vırýstyń kórshi elderge taralýynan qaýiptengen. Keıin aýrý Ýgandada da anyqtaldy. Osyǵan baılanysty DDU indetti halyqaralyq mańyzy bar densaýlyq saqtaý salasyndaǵy tótenshe jaǵdaı dep jarıalady.
Qazaqstan Densaýlyq saqtaý mınıstrligi qazirgi indet sırek kezdesetin Býndıbýgıo shtammynan týyndaǵanyn, oǵan qarsy álemde áli vaksına da, arnaıy em de joq ekenin naqtylady.