«Baǵaly qaǵazdardyń ortalyq depozıtarıi» (KCSD) basqarma tóraǵasy Edil Medeý 2026 jylǵy 1 qyrkúıekten bastap kompanıadaǵy jumysyn aıaqtaıdy. Ol depozıtarı basqarmasy quramynda bes jyldan astam qyzmet etti, dep habarlaıdy infohub.kz saıty.
Medeý KCSD-ge 2021 jyldyń maýsymynda basqarma tóraǵasynyń orynbasary bolyp kelgen edi. Ol strategıa, bıznesti damytý, depozıtarlyq qyzmet, táýekelderdi basqarý, halyqaralyq yntymaqtastyq jáne komýnıkasıalar baǵyttaryn qadaǵalady. 2025 jyldyń naýryzynda qarjy ınstıtýtyn basqardy.
KCSD-ge kelgenge deıin top-menedjer qarjy sektorynda 17 jyl tájirıbe jınaqtap, Qarjy naryǵyn retteý jáne qadaǵalaý agenttiginde, Ulttyq banktiń Qarjylyq qadaǵalaý komıtetinde, QR Ulttyq bankinde jáne Qarjy naryǵyn retteý jáne damytý agenttiginde jumys istegen.
Medeýdiń basshylyǵymen depozıtarı rekordtyq kórsetkishterge qol jetkizdi. 2025 jyldyń qorytyndysy boıynsha KCSD-niń taza paıdasy alǵash ret 2 mlrd teńgeden asty, rentabeldilik shamamen 20% boldy.
2026 jyldyń birinshi jartyjyldyǵynyń sońynda 2025 jyldyń basymen salystyrǵanda qyzmet kórsetiletin jergilikti quraldar kólemi memlekettik aksıalar paketterin eseptemegende 45%-ǵa, al sheteldikter 16%-ǵa ósti. KCSD júıesindegi brokerlik shottar sany 5,6 mln-ǵa jetti.
2022 jyldyń basynan bastap qyzmet kórsetiletin sheteldik baǵaly qaǵazdar shyǵarylymdarynyń sany 367%-ǵa – 1 584 birlikke deıin, al klıenttik bazadaǵy qarjy uıymdarynyń sany 141%-ǵa – 11 elden 128 kompanıaǵa deıin ósti. Rezedent emester men AHQO qatysýshylarynyń úlesi 62%-dan asty, dep bólisti kompanıada.
Osy kezeńde KCSD AQSh, Parsy shyǵanaǵy elderi, Túrkıa, Ázirbaıjan, Armenıa jáne Tájikstannyń jahandyq bankteri men depozıtarılerimen tikeleı mejdepozıtarlyq jáne korespondenttik baılanystar ornatty.
«KCSD-degi jumys men úshin mańyzdy kásibı kezeń boldy. Bes jyl ishinde komandamen birge qazaqstandyq kapıtal naryǵynyń múmkindikterin keńeıtip, halyqaralyq baılanystar men Ortalyq depozıtarıdiń aımaqtyq rólin nyǵaıtqan jobalardy júzege asyrdyq», – dedi Medeý.
Baǵaly qaǵazdardyń ortalyq depozıtarıi – baǵaly qaǵazdardy elektrondy túrde saqtaıtyn jáne olardyń kimge tıesili ekenin esepke alatyn basty qarjy uıymy.
Qarapaıym tilmen aıtqanda, bul aksıalar, oblıgasıalar jáne basqa da aktıvter úshin senimdi bank. Bırjada baǵaly qaǵaz satyp alǵanda, onyń sizdiki ekendigi týraly jazba dál Ortalyq depozıtarıde paıda bolady.
Buǵan deıin «Kýrsıv» qazaqstandyqtardyń baǵaly qaǵazdarmen jasaıtyn mámileleri baqylaýǵa alynatynyn jazǵan edi.