«Ańsaǵan sábı» memlekettik baǵdarlamasy aıasynda tegin kvotamen jasalǵan ekstrakorporaldyq uryqtandyrýdyń arqasynda Qazaqstanda 15 myńǵa jýyq bala dúnıege keldi. Bul týraly infohub.kz saıty habarlaıdy.
Almaty qalasynyń bala quqyqtaryn qorǵaý basqarmasynyń málimetinshe, suranystyń joǵarylyǵyna baılanysty memleket jyl saıynǵy kvota sanyn kóbeıtti — qazir jylyna 7 myńǵa deıin EKO kvotasy bólinedi.
Vedomstvo kóptegen otbasy úshin bul — ata-ana atanýdyń jalǵyz múmkindigi ekenin atap ótti, sebebi qymbat prosedýrany memleket tolyǵymen tóleıdi.
Taǵy bir mańyzdy jańalyq — bolashaq analarǵa arnalǵan «Bir kúndik klınıka» iske qosyldy. Osy formatta kabınetterdi aralap áýre bolmaı, alǵashqy keshendi skrınıngten 66 myńnan astam júkti áıel ótti.
«Bir kúndik klınıka» formaty júkti áıelderdi qysqa merzimde keshendi tekserýden ótkizýge, asqyný qaýpin azaıtýǵa jáne patologıalardy erte kezeńde anyqtaýǵa múmkindik beredi», — delingen habarlamada.
«Ańsaǵan sábı» baǵdarlamasy Qazaqstanda 2021 jyldyń qańtarynda Prezıdent Qasym-Jomart Toqaevtyń tapsyrmasymen bastaldy. Baǵdarlama aıasynda EKO kvotasynyń sany jeti esege artty. Ony júzege asyrý úshin Densaýlyq saqtaý mınıstrligi eldiń jetekshi beıindi mamandaryn tartyp, jumys tobyn qurdy.
Eske salaıyq, EKO-ǵa joldama alý úshin tirkelgen jerdegi emhanaǵa baryp, tekserýden ótip, belgili bir taldaýlardy tapsyrý qajet. Bedeýlik dıagnozy qoıylǵan soń arnaıy komısıa ekstrakorporaldyq uryqtandyrý prosedýrasyna joldama beredi.