Qazaqstandyq tenısshi Elena Rybakına AQSH-tyń ashyq chempıonaty-2026 basynda Áıelder tenıs qaýymdastyǵynyń (WTA) tiri reıtıńinde birinshi orynǵa kóterildi, dep habarlaıdy infohub.kz saıty.
Aǵymdaǵy esepteýler boıynsha, Rybakınanyń enshisinde 7911 upaı bar. Ekinshi orynǵa belarýstik Arına Sobolenko tústi, onyń 6585 upaıy bar. Alaıda týrnır bastalǵanǵa deıin jarıalanǵan resmı WTA reıtıńinde Sobolenko 8575 upaımen birinshi, al Rybakına 8141 upaımen ekinshi orynda tur.
US Open aldynda tenısshilerdiń 2025 jylǵy týrnırdegi ónerleri úshin upaılary esepten shyǵaryldy. Qazirgi chempıon Sobolenko 2000 upaı joǵaltty, al Rybakınanyń upaıy aıtarlyqtaı az alynyp tastaldy. Dál osy jaǵdaı qazaqstandyq ókilge bıylǵy US Open aıaqtalmaı jatyp tiri reıtıńte birinshi orynǵa shyǵýǵa múmkindik berdi.
Aıta ketý kerek, tiri reıtıń — bul tenısshilerdiń aǵymdaǵy týrnırlik apta barysynda ózgerip otyratyn nátıjeleri men upaılaryn eskere otyryp jasalǵan aldyn ala esepteý.
Degenmen Rybakınanyń tiri reıtıńtegi birinshi oryny ázirge álemniń birinshi raketkasy resmı mártebesin bildirmeıdi. Qorytyndy oryndar US Open nátıjelerine baılanysty bolady. WTA esepteýleri boıynsha, Rybakınanyń jartylaı fınalǵa shyǵýy oǵan qarsylastarynyń nátıjelerine qaramastan resmı reıtıńte birinshi oryndy kepildendiredi.