Qazaqstannyń Eńbek jáne halyqty áleýmettik qorǵaý mınıstrligi sýbsıdıalanatyn jumys oryndaryn uıymdastyrý qaǵıdalaryn jańartty. Endi negizgi kezeńder — jumys berýshilerdiń ótinimderin qabyldaýdan azamattardy bos jumys oryndaryna joldaýǵa jáne qujattardy tekserýge deıin — Elektrondyq eńbek bırjasy arqyly júzege asyrylady, dep habarlaıdy infohub.kz saıty.
Burynǵydaı, sýbsıdıalanatyn jumys oryndaryn mansap ortalyqtary jumys berýshilerdiń ótinimderi negizinde uıymdastyrady. Qatysýǵa jeke menshik nysanyndaǵy komersıalyq kompanıalar, jeke kásipkerler, sharýa jáne fermer qojalyqtary, áleýmettik kásipkerler, memlekettik mekemeler jáne olardyń vedimistik baǵynystaǵy uıymdary, kvazımemlekettik sektor sýbektileri, sondaı-aq úkimettik emes uıymdar qatysa alady.
Barlyq jumys berýshilerge biryńǵaı talaptar belgilengen: uıym 12 aıdan astam jumys isteýi tıis, bankrottyq rásiminde bolmaýy kerek, ekstremızmge qarsy is-qımyl salasyndaǵy zańnamany saqtaýy jáne jumyspen qamtýǵa járdemdesý sharalary aıasynda buryn jasalǵan sharttardy oryndaýy qajet.
Sýbsıdıalanatyn jumys oryndary jan basyna shaqqandaǵy memlekettik tapsyrys, ınfraqurylymdyq memlekettik satyp alý nemese arnaýly áleýmettik qyzmetter kórsetý baǵdarlamalary boıynsha búdjettik qarjylandyrý alyp jatqan jumys berýshilerde qurylmaıdy. Eńbek mınıstrliginde bul búdjetten birdeı shyǵyndardy qaıtalap qarjylandyrýdy boldyrmaý úshin qajet ekenin túsindirdi.
Sýbsıdıalanatyn jumys oryndarynyń sany jumys berýshiniń sanatyna baılanysty. Respýblıkalyq mańyzy bar qalalardaǵy úkimettik emes uıymdar úshin birden onǵa deıin qatysýshy, al óńirlerde birden beske deıin qarastyrylǵan. Bul rette ÚEU resmı derekqorda tirkelgen bolýy tıis.
Komersıalyq uıymdar, jeke kásipkerler, sharýa qojalyqtary jáne áleýmettik kásipkerler birden beske deıin sýbsıdıalanatyn jumys ornyn qura alady. Qatysý úshin olardyń jalaqy boıynsha bereshegi bolmaýy, sońǵy bir jyl ishinde áleýmettik tólemderdi turaqty júzege asyrýy jáne baǵdarlamanyń aldyńǵy kezeńderindegi qatysýshylardy turaqty jumysqa ornalastyrýy qajet.
Memlekettik organdar men kvazımemlekettik sektor sýbektileri úshin de birden beske deıin jumys orny qarastyrylǵan.
Aýyldyq ákimdikter men komýnaldyq kásiporyndar úshin jeke tártip belgilengen. Olar úshin sýbsıdıalanatyn jumys oryndarynyń sany aýyl turǵyndarynyń sanyna baılanysty bolady jáne jalpy turǵyndar sanynyń 2%-dan 5%-yna deıin quraıdy.
Jumys berýshilerdi irikteý, azamattardy jumys oryndaryna joldaý jáne qujattardy tekserý endi Elektrondyq eńbek bırjasy arqyly elektrondy formatta ótedi. Mınıstrlik sıfrlandyrý qaǵaz qujat aınalymyn qysqartady, ótinimderdi qaraýdy jyldamdatady jáne prosesti ashyq etedi dep kútedi.
Buǵan deıin «Kýrsıv» 2026 jyldyń basynan beri 50 jastan asqan 10 myńǵa jýyq jumyssyz qazaqstandyq «Kúmis jas» jobasy boıynsha jumysqa ornalasqanyn jazǵan bolatyn. Baǵdarlama aıasynda memleket qatysýshylardyń jalaqysyn ishinara sýbsıdıalaıdy, al jumys berýshiler sýbsıdıalaý kezeńi aıaqtalǵannan keıin olarǵa turaqty jumys ornyn berýge mindetti.