Qaraǵandydaǵy Maıqudyq turǵyn alabynda avtobýs pen jeńil kólik qatysqan apat boldy. Saldarynan qylmystyq is qozǵaldy, dep habarlaıdy infohub.kz saıty.
Apat týraly dorogi_karagandy Instagram-paraqshasyndaǵy jarıalanymnan belgili boldy. Onda kýágerler oqıǵa ornynan beınejazba jarıalaǵan. Kadrlarda qatty zaqymdalǵan aq kólik pen jedel járdem kóligi kórinedi.
Pikirlerde oblys polısıasy apat búgin, 6 qyrkúıekte, saǵat 07:30 shamasynda K. Marks kóshesinde bolǵanyn naqtylady. Qatysýshylar — Chevrolet Cobalt kóligi men Yutong marshrýttyq avtobýsy.
«Apat saldarynan Chevrolet Cobalt kóliginiń 36 jastaǵy jolaýshysy alǵan jaraqattarynan oqıǵa ornynda qaza tapty. Osy faktige qatysty sotqa deıingi tergeý bastaldy. Bolǵan oqıǵanyń mán-jaıy men sebepteri anyqtalyp jatyr», — dep túsindirdi Qaraǵandy oblysy polısıa departamentinde.
Quqyq qorǵaý organdary júrgizýshilerdi jol qozǵalysy erejelerin qatań saqtaýǵa, jol jáne aýa raıy jaǵdaıyna qaraı qaýipsiz jyldamdyqty tańdaýǵa, sondaı-aq jolda barynsha muqıat ári saq bolýǵa taǵy da shaqyrdy.