Ońtústik Afrıkanyń tuńǵysh qara násildi at sporty chempıony, tájirıbeli atbegi Enos Mafokate 80 jasynda dúnıeden ozdy. Bul týraly onyń otbasy beısenbi kúni málimdedi, dep habarlaıdy infohub.kz saıty.
Mafokate aparteıd jyldarynda tek aq násildi shabandozdar ústemdik etken sport túrinde násildik kedergilerdi buzǵan tulǵa retinde tanymal boldy. Ony halyq "Kgosi ya Dipere" — sesoto tilinde "Jylqylar patshasy" dep ataǵan.
Otbasynyń málimdemesinde: "Onyń joly Ońtústik Afrıkanyń at sportyndaǵy birneshe jetekshi tulǵalardyń arqasynda qalyptasty. Olar onyń erekshe qabiletin tanyp, sol kezdegi násildik kedergilerge qarsy turýyna mańyzdy sátterde qoldaý kórsetti", — delingen.
Mafokate atqorada jumys isteýden bastaǵan. Ol 1963 jyly alǵashqy at jarysynda jeńiske jetken, alaıda eldegi segregasıa zańdary oǵan 1975 jylǵa deıin basqa jarystarǵa qatysýǵa tyıym salǵan. 1980 jyly ol halyqaralyq deńgeıde saıysqa túsken tuńǵysh qara násildi ońtústikafrıkalyq atandy — Ýemblıdegi Kоróldik halyqaralyq at kórmesinde 31 shabandozdyń ishinen besinshi oryndy ıelendi.
1991 jyly aparteıd joıylyp, Halyqaralyq olımpıada komıteti Ońtústik Afrıkany Olımpıada oıyndaryna qaıta qabyldaǵannan keıin, onyń eńbegi elenip, 1992 jyly Barselonadaǵy Olımpıadaǵa sport elshisi retinde bardy. Otbasynyń aıtýynsha, "Onyń joly aparteıdtiń aýyr shyndyǵynan halyqaralyq deńgeıdegi saıystarǵa deıin jetti. Alaıda onyń ómiriniń máni arenadaǵy jetistikterinen áldeqaıda tereńirek edi".
Sońǵy jyldary ol Soýeto qalashyǵyndaǵy jas qara násildi shabandozdardy daıarlaýmen aınalysty. Ol 2006 jyly qurǵan Soýeto at sporty ortalyǵynda júzdegen jasty atqa minýge jáne janýarlarǵa kútim jasaýǵa úıretti. 2015 jyly Ońtústik Afrıkanyń sport syılyqtarynda ol ómir boıy jetistikteri úshin marapatqa ıe boldy.