InfoHub Logo

2000 jyldardyń basynda Atyraý oblysyndaǵy jas balanyń erte qartaıyp bara jatqany týraly jańalyq kópshilikti eleń etkizgen edi. Sırek kezdesetin teriniń erte qartaıýy (progerıa) dertine shaldyqqan Nurjan Órkeshbaev sol jyldary el ishinde ǵana emes, sheteldik teleekrannan jıi kórindi. El.kz saıty onyń búgingi tynys-tirshiligin bilý úshin keıipkermen qaıta habarlasty.

Bul týraly Infohub.kz aqparat agenttigi habarlaıdy.

Nurjannyń búgingi tirshiligi

Nurjan Órkeshbaev – búginde 35 jasta. Ol Atyraý oblysynyń Qyzylqoǵa aýdanyna qarasty Muqyr aýylynda dúnıege kelgen. Týǵan jerinen uzap kórmegen Nurjan osy kúnge deıin sol aýylda anasymen birge turyp keledi. Onyń inisiniń eki kishkentaı qyzy bar, Nurjan kúndelikti sol búldirshinderdiń qyzyǵyna qarap, ýaqytyn otbasymen birge ótkizedi.

Aıtýynsha, sońǵy eki jylda ómirinde aıtarlyqtaı ózgeris bolmaǵan. Degenmen densaýlyǵyna qatysty jaǵdaıy turaqty. «Allaǵa shúkir, densaýlyǵym jaqsy, bári oıdaǵydaı», - deıdi ol.

Nurjannyń aıtýynsha, jumysqa ornalasý máselesi áli de sheshilmegen. Densaýlyǵyna baılanysty túrli mekemeler arasynda túsinispeýshilik týyndap, eńbekke jaramdylyǵy jónindegi qujat máselesi kedergi bolyp otyr. «Aýrýhana jumysqa jaramdysyń deıdi. Al jumysqa barsam, jumys berýshiler arnaıy qaǵaz suraıdy. Ony surasam, aýrýhana ondaı qujat joq deıdi. Solaı másele sheshilmeı keledi», - deıdi Nurjan.

Qazirgi tańda ol nápaqasyn qurylys salasynda tabady. Qolynan kelgenshe qurylys jumystaryna aralasyp, kúndelikti turmys qajetine jaratar tabys taýyp júr. Al demalys kúnderi toı-tomalaqtarǵa shyǵyp, qosymsha tabys tabatynyn jetkizdi.

Esterińizge sala keteıik, Nurjan Órkeshbaev 2015 jyly Ásemgúl esimdi arýmen shańyraq kótergen edi. Alaıda, otaý qurǵan Nurjannyń jubaıymen dám-tuzy jaraspaı, qos juptyń joly ekige aıyrylǵan. Nurjannan qazirgi jeke ómiri jaıly suraǵanymyzda, ol ázirge boıdaq ekenin aıtty. «Joq, qaıtadan shańyraq kótergen joqpyn, ázirge boıdaqpyn», - dep qysqa qaıyrdy.

«Qazir eshkim izdemeıdi»

2024 jyly El.kz tilshisi Nurjan Órkeshbaevpen suhbattasqanda, onyń 2012 jyly Atyraý qalasynan bir bólmeli páter alǵanymen, áli kúnge deıin baspanany óz atyna rásimdeı almaı júrgenin jazǵan edi. Sol kezde Nurjan páterdi óz atyna aýdarý úshin úshinshi toptaǵy múgedektik týraly qujat qajetin, sondaı-aq qosymsha tólem jasaý kerektigi aıtylǵanyn jetkizgen bolatyn. Budan bólek, zeınetaqy máselesi de sheshilmeı kele jatqanyn aıtyp, túrli mekemelerden naqty qoldaý kórmegenine qynjylǵan edi.

Araǵa ýaqyt salyp, bul máseleniń sheshilgen-sheshilmegenin suraǵanymyzda, Nurjan jaǵdaıdyń áli ózgermegenin aıtty. «Iá, 2012 jyly Atyraýdan páter aldym. Biraq qazirgi tańda ol páter áli kúnge deıin óz atymda emes. Qashan aýdaratyny belgisiz. Kezinde tanymal boldyq qoı, qazir eshkim izdep jatqan joq. Tek qurdastarym, dostarym habarlasyp turady. Basqa jaqtan kóp izdep jatqan eshkim joq», - deıdi ol.

Nurjannan búginde qandaı armany oryndalmaı júrgenin suradyq. Onyń aıtýynsha, arman kóp, tek sonyń bárine birtindep jetýdi qalaıdy. «Arman kóp. Aıta bersem, sheksiz ǵoı. Qazir eń aldymen nesıem bar, sony jaýyp, baspanamdy óz atyma aýdarsam degen nıet bar. Úılenip balaly-shaǵaly bolyp, anama qýanysh kórsetsem deımin. Turaqty jumysqa da turý qajet», - dedi Nurjan Órkeshbaev.

Kezinde kópshiliktiń nazarynda bolǵan Nurjan Órkeshbaev búginde qarapaıym aýyl tirshiligin keship otyr. Densaýlyǵyna shúkirshilik etip, adal eńbekpen kún kórip júrgen ol da el qatarly baspana, turaqty jumys, otbasy baqyty sekildi qarapaıym armandarǵa umtylady. Jyldar ótse de, onyń keıbir máseleleri sheshimin tappaǵan. Soǵan qaramastan Nurjan úmitin úzbeı, erteńnen jaqsylyq kútetinin ańǵartty.