Elordada «Astana – esirtkisiz qala!» atty taqyryptyq jolaýshylar poıyzy júre bastady. Ol kún saıyn Astana – Býrabaı baǵytymen qatynaıdy. Joba «Zań jáne tártip» baǵdarlamasy aıasynda júzege asyrylýda, dep habarlaıdy infohub.kz.
Polısıa departamentiniń baspasóz qyzmetiniń málimetinshe, poıyz vagondary esirtkiden bas tartýǵa, salaýatty ómir saltyn ustanýǵa jáne zańdy saqtaýǵa shaqyratyn eskertý jazýlarymen jáne taqyryptyq materıaldarmen bezendirilgen. Sondaı-aq esirtkiniń zańsyz aınalymy faktileri týraly habarlaýǵa bolatyn anonımdi qyzmetterdiń baılanys derekteri ornalastyrylǵan.
Polıseılerdiń aıtýynsha, Astana men Býrabaı arasynda qatynaıtyn poıyz mobıldi profılaktıkalyq alańǵa aınalady. Ony kún saıyn júzdegen jolaýshy paıdalanady, osynyń arqasynda profılaktıkalyq materıaldar turaqty túrde keń aýdıtorıany qamtyp, salaýatty ómirdiń qundylyǵyn, jeke jaýapkershilikti jáne esirtkige tózbeýshilikti eske salyp otyrady.
«Nurly jol» temirjol vokzalynda da profılaktıkalyq jumys jolǵa qoıylǵan. Onda taqyryptyq ınteraktıvti aımaqtar men profılaktıkalyq alańdar uıymdastyrylyp, sporttyq jáne kórsetilimdik sharalar ótkizilip, aqparattyq ekrandarda esirtkige qarsy beınerolıkter kórsetilýde. Polısıadaǵylar vokzal elorda turǵyndary men qonaqtary kóp jınalatyn oryndardyń biri ekenin, sondyqtan munda profılaktıkalyq jumys júrgizýdiń erekshe mańyzy bar ekenin túsindirdi.
Endi vokzal jolaýshylary taqyryptyq materıaldardy únemi kóre alady, al poıyzdyń ózi Astana – Býrabaı baǵyty boıynsha profılaktıkalyq mısıasyn jalǵastyrady.