Ulybrıtanıa turǵyny Etel Katerhem 117 jasqa tolǵan týǵan kúnin otbasy men jaqyn dostarynyń ortasynda atap ótti. Ol tarıhta osyndaı joǵary jasqa jetken alǵashqy brıtandyq atandy, dep habarlaıdy infohub.kz saıty.
Mereıger Londonǵa jaqyn ornalasqan Sýrreı graftyǵyndaǵy qarttar úıinde turady. Merekesin ol týystary men dostarynyń qasynda ótkizdi. Uzaq jasaǵan qarıaǵa quttyqtaýlar álemniń túkpir-túkpirinen, sonyń ishinde planetadaǵy eń kári er adam dep tanylǵan Brazılıanyń 113 jastaǵy turǵyny Jýan Marıno Netodan da keldi.
Etel Katerhem 1909 jyly 21 tamyzda dúnıege kelgen. Ol ómirinde kоról Edýard VII-niń bıligin, eki dúnıejúzilik soǵysty, «Tıtanıktiń» apatyn jáne koronavırýs pandemıasyn kórdi. 18 jasynda bolashaq rekordshy Úndistanǵa ketip, onda kútýshi bolyp jumys istedi. Keıin ol brıtan armıasynyń maıory Norman Katerhemge turmysqa shyqty. Jubaılar biraz ýaqyt Gonkongta turyp, sodan keıin Ulybrıtanıaǵa qaıtyp oraldy.
Etel kúıeýinen de, eki qyzynan da asyra ómir súrdi. Qazir onyń úsh nemeresi jáne bes shóberesi bar. Oǵan álemdegi eń kári adam mártebesi 2025 jyldyń sáýirinde brazılıalyq monah Inah Kanabarro Lýkas qaıtys bolǵannan keıin aýysty.
Etel Katerhem óziniń uzaq ǵumyrynyń basty qupıasyn ómirge sabyrly qaraý jáne janjaldan aýlaq bolý dep sanaıdy. Ol buryn eshkimmen eshqashan daýlaspaıtynyn, árqashan áńgimelesýshilerdi muqıat tyńdaıtynyn, biraq sońynda ózi qajet dep sanaǵandaı áreket etetinin moıyndaǵan. Rekordqa qaramastan, absolútti álemdik tıtýl ázirge 122 jyl 164 kún ómir súrgen fransýz áıeli Janna Kalmanǵa tıesili.