FIFA bas operasıalyq dırektory Kevın Lamýr shilde aıynyń sońynda federasıa prezıdenti Djannı Infantınony jarıa túrde synaǵannan keıin qyzmetinen ketti, dep habarlaıdy infohub.kz saıty.
RBK New York Times-qa silteme jasap habarlaǵandaı, Lamýrdyń jumystan shyǵarylýy 31 shildede ol basqarǵan departamenttiń FIFA Forward Enterprise (FFE) baǵdarlamasyna qatysty janjal aıasynda Infantınony synaǵan málimdeme jarıalaǵannan keıin boldy. FIFA ókili Lamýrdyń ketýin rastap, eki jylǵy jumysy úshin alǵys aıtyp, bolashaqta sáttilik tiledi. Buǵan deıin Lamýr Infantınomen birge ÝEFA-da da jumys istegen.
FIFA-daǵy janjal federasıanyń áıelder, erler jáne klýbtyq álem chempıonattarynyń quqyqtaryn jeke ınvestorlarǵa satý jobasyn jasaǵannan keıin órshidi. Eýropalyq fýtbol qaýymdastyqtary odaǵynyń (ÝEFA) barlyq músheleri bul bastamadan tolyq bas tartylǵanǵa deıin FIFA týrnırlerine boıkot jarıalady. ÝEFA ustanymyn Amerıka jáne Azıa konfederasıalary qoldady, olar FIFA-ny jańa komersıalyq tujyrymdamany qalyptastyrýda jetkilikti ashyqtyq tanytpady dep aıyptady.
Janjal aıasynda FIFA basshysynyń keńesshisi narazylyq retinde jumystan ketkeni belgili boldy. Tipti ÝEFA-da álem chempıonatynyń óz nusqasyn ótkizý jospary ázirlendi. Keıin FIFA álem chempıonatynyń quqyqtaryn satýdyń janjaldy josparynan bas tartty.
Jýyrda FIFA basshylyǵy Infantınoǵa qoldaý bildirip, ÁCh quqyqtaryn satý jobasyndaǵy qatelikterdi moıyndady. Sondaı-aq FIFA Djannı Infantınonyń bedeline nuqsan keltirý áreketteri bolǵanyn málimdedi. AQSh fýtbol federasıasy FIFA basqarý qurylymyna ózgerister engizýdi talap etip, birqatar basqa fýtbol odaqtarymen birlesken málimdeme jarıalady.