InfoHub Logo

Qazaqstandyqtar álemdegi eń iri IT-jobalardy hostıngileıtin GitHub servısine kirýde qıyndyqtarǵa kezigýde. Bul týraly Infohub.kz aqparat agenttigi habarlaıdy.

Sońǵy kezderi birqatar qazaqstandyq paıdalanýshylar GitHub platformasyna kire almaı, áleýmettik jelilerde shaǵymdana bastady. Olardyń aıtýynsha, servıs tek VPN (Virtual Private Network) qosylǵan jaǵdaıda ǵana jumys isteıdi. Bul jaǵdaı, ásirese, baǵdarlamashylar men IT salasyndaǵy mamandar úshin mańyzdy, sebebi GitHub olardyń negizgi jumys quraly bolyp tabylady.

Ne boldy?

Redaksıaǵa habarlasqan oqyrmandardyń biri servıspen jumys isteı almaıtynyn aıtyp shaǵymdandy. Onyń aıtýynsha, bul másele birden birneshe baılanys operatorlarynda baıqalady. Ol servıs baǵdarlamalyq jasaqtama ázirleýshileri úshin óte mańyzdy ekenin atap ótti.

Áleýmettik jelilerde de GitHub-tyń turaqsyz jumysy týraly shaǵymdar kóbeıgen. Mysaly, Reddit jelisindegi qazaqstandyq paıdalanýshylardyń biri birneshe kún boıy resýrstan derekterdi júktep alýǵa tyrysqanyn, biraq sátsizdikke ushyraǵanyn jazdy.

«Úsh kún boıy osy saıttan eshteńe júkteı almaı otyrmyn, VPNsiz múmkin emes. Bul qurylǵynyń nemese ınternettiń máselesi emes. Bes túrli qurylǵyny, tórt túrli Wi-Fi jelisin aýystyryp kórdim. Biraq ár jerde birdeı qatelik shyǵady. Úıdegi DNS-serverdi aýystyryp kórdim, tipti kofeınáǵa baryp ta tyrystym, biraq VPNsiz amal tappadym», - dep jazdy paıdalanýshy.

IT mamandarynyń alańdaýshylyǵy

Threads áleýmettik jelisindegi baǵdarlamashylar kásibı qyzmet úshin osylaısha «temir perde» ornatylýyna alańdaýshylyq bildirýde.

«GitHub-tan kod alýǵa tyrystym – kirgizbedi. VPN qostym – jumys istedi. Endi oılanyp otyrmyn: bul qashannan qalypty jaǵdaıǵa aınaldy? Men búkil álem qoldanatyn quralǵa qoljetimdiliktiń buǵattalýyna tań qalmaıtyn boldym ba?» - dep jazdy bir post avtory.

Pikirtalasqa qatysýshylardyń aıtýynsha, Qazaqstanda GitHub-pen buryn da problemalar bolǵan, biraq qazir olar júıeli sıpat alǵan.

Redaksıa da servıs jumysyn tekserip, GitHub portalynyń ózi ashylatynyn, biraq faıldardy júktep alý kezinde qıyndyqtar týyndaıtynyn anyqtady. Kóbinese (biraq barlyq jaǵdaıda emes) saıt qatelik beredi, better júktelmeıdi. Al VPN qosylǵanda faıldar esh qıyndyqsyz júkteledi.

Memlekettik organdar ne deıdi?

Redaksıa tıisti vedomstvolardan túsinikteme surady. Jaýapty «Memlekettik tehnıkalyq qyzmet» AQ (MTQ) berdi:

«Ótinishte keltirilgen GitHub resýrstaryna qoljetimdilikke qatysty múmkin bolatyn shekteýler týraly aqparatqa sáıkes, «MTQ» servıstiń jumysyndaǵy úzilisterge esh qatysy joq ekenin habarlaıdy. Osyǵan baılanysty, bul ótinishti qaraý quzyretti organdar men (nemese) baılanys operatorlaryna óz quzyreti aıasynda qaraýǵa jatady», - dep habarlady tehnıkalyq qyzmet.

Redaksıa ınternet-resýrstarǵa qoljetimdilikti qadaǵalaıtyn basqa da memlekettik organdardan túsinikteme alýǵa tyrysýda.

GitHub degen ne?

GitHub – IT-jobalardy hostıngileý jáne birlesip damytý boıynsha álemdegi eń iri veb-servıs. Búgingi tańda bul mıllıondaǵan baǵdarlamashylar, ınjenerler jáne derekter ǵalymdary úshin negizgi jumys quraly bolyp sanalady. Resýrs bank qosymshalary, memlekettik qyzmetter, jasandy ıntellekt júıeleri jáne qarapaıym veb-saıttardy qurýda qoldanylatyn mıllıondaǵan ashyq kitaphanalar men kodtardy saqtaıdy.