Zamanaýı neırojeliler óz múmkindikterimen tań qaldyrýdy jalǵastyrýda. GPT-6 Astra jasandy ıntellektiniń jańa modeli adamdardy kompúterlik baǵdarlamalardan ajyratý úshin arnaıy ázirlengen barlyq tekserýden óte aldy. Ol I’m Not a Robot oıynynyń 48 tapsyrmasyn sátti oryndady, dep habarlaıdy infohub.kz saıty.
Modeldiń múmkindikterin kórsetetin beınerolıkti ázirleýshi Sharıf Shamım jarıalady. «Astra I’m Not a Robot oıynynyń barlyq 48 deńgeıinen sátti ótti», — dep jazdy ol.
Oıyn «Men robot emespin» degen jazýdyń janyna qusbelgi qoıý sıaqty qarapaıym ótinishten bastalady. Alaıda keıin tapsyrmalar aıtarlyqtaı kúrdelene túsedi: oıynshy sýretterden zattardy taýyp, basqatyrǵyshtardy sheship, qajetti túımelerdi basýy kerek.
Buryn mundaı tekserýlerdi tek adam ǵana durys oryndaı alady dep esepteletin. Alaıda eksperıment zamanaýı jasandy ıntellekttiń de tapsyrmalardy túsinip, qajetti áreketterdi ózdiginen oryndaı alatynyn kórsetti.
OpenAI kompanıasy GPT-6 Astra veb-saıttar men baǵdarlamalardy paıdalana alatynyn habarlady. Mysaly, model aqparat izdep, qujattardy toltyryp, kompúterde basqa da áreketterdi oryndaı alady.
Degenmen, alynǵan nátıje jasandy ıntellekt kez kelgen saıttyń qorǵanysyn aınalyp óte alady degendi bildirmeıdi. I’m Not a Robot — bul oıyn-saýyq oıyny, naqty qaýipsizdik júıesi emes.