Japonıanyń ataqty ǵalymy, 2000 jylǵy hımıa salasyndaǵy Nobel syılyǵynyń laýreaty Hıdekı Sırakava 90 jasynda dúnıeden ozdy. Ol ótkizgish polımerlerdi ashyp, damytqany úshin marapattalǵan edi. Bul týraly infohub.kz saıty habarlaıdy.
Sırakavanyń amerıkalyq ǵalymdar Alan Hıger men Alan MakDıarmıdpen birge jasaǵan jańalyǵy plasıktiń metal sıaqty elektr togyn ótkize alatynyn dáleldep, ony elektronıka salasynda qoldanýǵa jol ashty.
Sýkýba ýnıversıtetiniń málimetinshe, ǵalym 24 tamyzda qaıtys bolǵan. Ýnıversıtette ol 1979 jyldan beri qyzmet etip, ǵylymı jumystarmen aınalysqan. Alaıda qaıtys bolý sebebi naqtylanbaǵan. Japonıanyń iri gazeti «Iomıýrı» Sırakavanyń Tokıodan batysqa qaraı ornalasqan Iokogama qalasyndaǵy aýrýhanada qaıtys bolǵanyn habarlady.
1936 jyly Tokıoda týǵan Sırakava 1966 jyly Tokıo tehnologıalyq ınstıtýtynda ınjenerlik ǵylymdar boıynsha doktorlyq dáreje aldy. On jyldan keıin ol Pensılvanıa ýnıversıtetine zertteýshi bolyp ornalasyp, MakDıarmıd pen Hıgermen birlesip jumys istedi.
Ǵalymdardyń plasıkterdiń ótkizgish emestigi týraly qalyptasqan túsinikke qarsy shyqqan zertteýleri arzan ári jeńil, ıkemdi ótkizgish materıaldardy jasaýǵa múmkindik berdi. Bul materıaldar kún batareıalary men uıaly telefon ekrandarynda qoldanylady.