Úndistandyq Djotı Shrıvastava zymyran jobalaǵan áskerı qyzmetten balalarǵa arnalǵan tary negizindegi paıdaly ári tabıǵı ónim shyǵarý úshin ketti. Onyń "Little Cherry Mom" balalar taǵamy brendiniń negizin qalaýshy retindegi tarıhy úndistandyq BAQ nazaryn aýdardy, dep habarlaıdy infohub.kz saıty.
Buryn ol ınjener bolyp, Úndistan armıasy úshin zymyran ázirleýmen aınalysqan. Alaıda tuńǵysh balasy dúnıege kelgen soń qyzmet salasyn túbegeıli ózgertýge bel býdy. Ulyna alǵashqy qosymsha taǵam tańdaýda qıyndyqqa tap bolǵan Shrıvastava "tabıǵı" dep atalatyn tanymal ónimderdiń kóbinde tazartylǵan qant, untaq un jáne jasandy qospalar bar ekenin baıqady.
2022 jyly Mırýt qalasynda (Ýttar-Pradesh shtaty) ol tary (mıllet) negizinde balalarǵa arnalǵan paıdaly taǵam óndiretin jeke kásibin ashty. Assortımentke dosaǵa arnalǵan daıyn qospalar, un, qantsyz jáne pálma balynsyz laddý, sondaı-aq dástúrli qytyrlaq khakra nan ónimderi endi. Balalar rasıonyn tereńirek meńgerý úshin kásipker IýNISEF-tiń erte jastaǵy balalardy tamaqtandyrý sertıfıkatynan ótip, aıýrveda eńbekterin zerttedi.
Qarjylandyrýdy izdeý jáne dekretten keıin mansapty qaıta bastaý qıyndyqtaryna qaramastan, Shrıvastavanyń startapy sátti damydy. Búginde brendtiń klıenttik bazasy búkil Úndistan boıynsha 70 myńnan astam adamdy quraıdy, al kompanıanyń jyldyq tabysy 1 kror (10 mıllıon) úndistandyq rýpıdi asyp tústi. Kásipker sondaı-aq "Shark Tank India" bıznes-shoýynyń besinshi maýsymyna qatysty.