Italıada qaıǵyly oqıǵa boldy: otbasy 31 jastaǵy ulynyń qaıtys bolǵanyn baıqamaı, shamamen 100 shaqyrym jol júrip ótti. Ata-anasy onyń jaı ǵana demalyp jatyr dep oılaǵan, dep habarlaıdy infohub.kz saıty.
Corriere della Sera basylymynyń málimetinshe, oqıǵa jeksenbi kúni úsh adamnan turatyn otbasynyń avtomobılmen Týrın baǵytyndaǵy tasjolda kele jatqan kezde bolǵan. Kólikti ákesi basqarǵan, anasy jolaýshylar ornynda otyrǵan, al uly artqy orynda bolǵan.
Maqalada aıtylǵandaı, artqy oryndaǵy er adam tirshilik belgisin bermegen, biraq ata-anasy ony uıyqtap jatyr dep oılap, uzaq ýaqyt boıy baıqamaǵan. Keıin olar ulyn shaqyryp kórgen, biraq jaýap almaǵan. Kólikti toqtatyp, onyń tamyry soqpaı turǵanyn anyqtap, dárigerlerdi shaqyrǵan, alaıda dárigerler tek ólimdi rastaǵan.
Ata-anasynyń aıtýynsha, uly sońǵy sózin aıtqannan keıin olar shamamen 100 shaqyrym jol júrgen. Gazettiń dereginshe, ólimge júrek talmasy sebep bolǵan. Er adamnyń tiri kezinde júreginde azdaǵan aqaý bolǵany belgili.