InfoHub Logo

Qazaqstanda mamyrdyń 9 Jeńis kúni memlekettik mereke bolyp tabylady. 1941—1945-jyldar aralyǵyndaǵy Uly Otan soǵysyna 35 mln adam, sonyń ishinde 1,5 mln Qazaqstandyq qatysty. Bul respýblıka halqynyń 18 ben 50 jas aralyǵyndaǵy eresekterdiń 70 paıyzy. Urystardyń alǵy shebinde Qazaqstannan jiberilgen 23 birlestik, 50 shaqty polktar men batalóndar shaıqasty. Qazaqstandyqtar Máskeý men Lenıngradty janyn qıa qorǵap, Ýkraına men Belarýsti, Prıbaltıka men Moldovany azat etýge atsalysty, Berlın shabýylyna qatysty. Janqıarlyq erligi men batyrlyǵy úshin 96638 qazaqstandyq jaýynger birneshe dúrkinnen orden jáne medaldarmen marapattaldy. 497 jerlesimiz Keńes Odaǵynyń Batyry atandy. Olardyń tórteýi bul ataqqa eki márte ıe boldy. 142 jaýynger «Dańq» ordeniniń tolyq ıegeri boldy.

Soǵystyń 4 jyly ishinde Qazaqstan memleketke 482,8 myń tonna astyq, 217,6 myń tonna kartop, 143,2 myń tonna kókónis, 1193,2 myń tonna qant qyzylshasyn, 155 ,3 myń tonna maqta tapsyrdy. Qazaqstan eńbekshileri maıdanǵa 25 mıllıon dana jyly kıim, Otan qorǵaý qoryna 4 mıllıard somnan astam qarajat berdi. Qazaqstan maıdanǵa qorǵasynnyń 85 paıyzyn, mystyń 30 paıyzyn, kómir men munaıdyń barlyǵyn óndirdi. Sol aýyr jyldarda elimiz maıdanǵa 6 mıllıon tonna bıdaı, 797 myń tonna et, 150 myń minis jylqysyn berdi. Sondaı-aq, respýblıkamyz 4 mıllıard som aqsha jınap, áskerı tehnıkalar men qarý-jaraqtar satyp áperdi.

Fashısik Germanıanyń jeńiliske ushyrap, kapıtýlásıa aktisine qol qoıylǵan kún 1945 jyldyń 8-mamyr kúni. Biraq Uly Otan Soǵysyndaǵy Jeńis kúni 9-mamyr kúni toılanady.

---