Pavlodar oblysynda ata-anasynyń qamqorlyǵynsyz qalǵan qyz memlekettik turǵyn úı qorynan baspana alý quqyǵyn sot arqyly qalpyna keltirdi, dep habarlaıdy infohub.kz saıty.
Joǵarǵy sottyń resmı Telegram-arnasynda habarlanǵandaı, 2008 jyly oblys turǵyny balalar úıine ornalastyrylǵan. Alaıda ony «jetim balalar men ata-anasynyń qamqorlyǵynsyz qalǵan balalar» sanaty boıynsha turǵyn úı alý kezegine tek 2014 jyly qoıǵan.
2023 jyly ýákiletti organ qyzdy basqa eldi mekenge turaqty turýǵa kóshkenin alǵa tartyp, kezekten shyǵarǵan. Sotqa deıin ol 2008 jyldan — balalar úıine qabyldanǵan kezden bastap esepke qoıý quqyǵyn qalpyna keltirýdi talap etken. Birneshe ret ótinish bergenine qaramastan, ony tek alǵashqy esepke qoıylǵan kúnnen — 2014 jyldan bastap qana kezekke qaıta qoıǵan.
Bul sheshimmen kelispegen talapker 2008 jyldan bastap turǵyn úı alý úshin esepke qoıý quqyǵyn taný týraly talappen sotqa júgingen.
Sot anyqtaǵandaı, qamqorshylyq fýnksıalaryn júzege asyrǵan organdar men uıymdar óz mindetterin tıisinshe oryndamaǵandyqtan, talapker ýaqtyly kezekke qoıylmaǵan. Keshiktirip esepke qoıý talapkerdiń kinásinen bolmaǵan: kámeletke tolmaǵandyqtan, ol turǵyn úıge degen quqyǵyn ózdiginen júzege asyra almaǵan. Ol tárbıelengen balalar úıi qazirgi ýaqytta taratylǵan.
Ýákiletti organ talapkerdiń patronattyq tárbıede bolǵanyn dáleldeıtin, istiń mán-jaıyn quqyqtyq baǵalaýǵa áser etýi múmkin eshqandaı dálel usynbaǵan. «Turǵyn úı qatynastary týraly» zańǵa sáıkes, turǵyn úıge muqtaj dep tanylyp, esepke qoıylǵan jetim balalar men ata-anasynyń qamqorlyǵynsyz qalǵan balalar baspana alǵanǵa deıin esepten shyǵarylýǵa jatpaıdy.
Laýazymdy tulǵalardyń zańsyz áreketteri talapkerdiń konstıtýsıalyq quqyqtary men zańdy múddeleriniń buzylýyna ákep soqqan. Sot memlekettik organdardyń áreketsizdigin de, jekelegen laýazymdy tulǵalardyń áreketteriniń zańsyzdyǵyn da anyqtaǵandyqtan, balalar úıine qabyldanǵan kúnnen bastap memlekettik turǵyn úı qorynan baspana alý quqyǵy qalpyna keltirildi. Sheshim zańdy kúshine engen.