Jırenshe ózi bir jaqqa jolaýshy ketkende osy qatyny ólipti. Jırenshe barǵan jolynan qaıtyp kelip, áýeli Jánibek hanǵa jolyǵyp otyrǵanda Jánibek han esittirgen eken. Mynadaı túrde estirtti:
— Ákesi ólse qaıtedi eken, sheshenim?
— Asqar taýy qulady deseıshi.
— Sheshesi ólse qaıtedi, sheshenim? — depti.
— Aǵar bulaǵy sýalǵan esepti bolady da.
— Aǵasy ólse qaıtedi eken, sheshenim? — degende:
— Oń qanaty qaırylǵan esepti daǵy.
— İnisi ólse qaıtedi eken, sheshenim? — depti.
— Sol qanaty qaırylǵan esepti daǵy, — depti.
— Apa-qaryndasy ólse qalaı bolady, sheshenim? — degende:
— Uzyn órisi qysqarǵan esepti daǵy.
— Qatyny ólse qaıtedi, sheshenim? — degende, qamshysyn eki búktep, shalt júginip, qamshysyna súıenip otyr eken.
Qamshynyń saby shart etip synyp, úzilip ketipti.
— Qatyn ólse qamshynyń saby synǵan esepti bolady da, — depti. — Qamshysynyń saby synǵanda qatyny ólse, jaı maıy buzyldy. Jaı maıy buzylǵan esepti boldy deıin dep otyr edim, — degende, Jánibek han:
— Sheshenim, olaı bolsa ózińiz aıtqandaı, qamshyńyzdyń saby synǵandaı jumysyńyz boldy-aý! — degen. Osylaı esittirgen eken deıdi. Qaıdan bileıin qasynda joqpyn, múmkin estigen qulaǵymnyń jazyǵy joq deımin....