Fýtzaldan el chempıony almatylyq «Qaırat» senbide, 19 qyrkúıekte ulttyq birinshiliktiń turaqty maýsymynyń úshinshi týrynda «Semeıdi» utyp, turaqty kezeńniń kóshbasshysyna aınaldy, dep habarlaıdy infohub.kz saıty.
Fýtzaldan el chempıonatynyń turaqty maýsymy bir apta buryn bastalǵan edi, alǵashqy eki týrdan keıin eki jeńiske jetken tórt kóshbasshy boldy. Kesteniń basynda eki oıynda joǵary lıga debútanty kókshetaýlyq «Oqjetpestiń» qaqpasyna 17 gol soqqan el vıse-chempıony «Semeı» turdy. Sondaı-aq 6 upaı «Kaspıde» — ol syrt alańda «Astanany» eki ret utty, el chempıony «Qaıratta» — ol taǵy bir debútant «Elordany» eki ret tize búktirdi, jáne «Aqtóbede» — ol syrt alańda «Shymkentti» eki ret utty.
Senbide, 19 qyrkúıekte úshinshi týr kóshbasshylar tórttiginiń bir múshesiniń shyǵyp qalýymen bastaldy: «Kaspı» astanada kútpegen jerden «Elordaǵa» 4:7 esebimen jol berip, 6 upaımen besinshi orynǵa tústi. Al úshinshi týrdyń ortalyq machy Almatyda ótken maýsymnyń eki fınalısi — jergilikti «Qaırat» pen «Semeı» arasynda ótti. Qonaqtar bul oıynda esepti birinshi ashty: óziniń burynǵy klýbynyń qaqpasyn «Qaırattyń» eks-kapıtany Birjan Orazov dál kózdedi, alaıda keıin «Semeıdiń» qaqpashysy Jaıme alańnan qýyldy da, Azat Valıýllın teńdikti qalpyna keltirdi.
Kóp uzamaı taǵy bir eks-qaırattyq Shyńǵys Esenamanov qonaqtardy qaıtadan alǵa shyǵardy, biraq Atırson Olıveıra men Kaıo Rýıs úziliske deıin Almaty klýbynyń esepte basymdyǵyn ornatty — 3:2. Al Jahangır Rashıt pen Kaıo Rýıs úzilisten keıin «Qaırattyń» basymdyǵyn tipti aıqyndaı túskende, bul machta bári sheshilgendeı kórinýi múmkin edi. Alaıda keıin «Semeıdiń» eki legıonery Pedrıno men Dedezıno óz komandasynyń artta qalýyn azaıtty, qonaqtar qutylýǵa qulshyna umtyldy, biraq ýaqyt jetpedi — «Qaırattyń» paıdasyna 5:4.
Almatylyqtar 9 upaı jınap, turaqty maýsymnyń kóshbasshysy atandy, ras, tek soǵylǵan jáne jiberilgen goldar aıyrmasy boıynsha, óıtkeni kóshbasshylar tórttiginiń taǵy bir múshesi «Aqtóbe» syrt alańda «Oqjetpespen» machta sońǵy mınýttarda 3:2 esebimen jeńiske jetip, sondaı-aq 9 upaı jınady. Úshinshi oryndy 7 upaımen senbide syrt alańda «Shymkentti» 4:2 esebimen utqan «Atyraý» ıelendi, sondaı-aq 7 upaı rýdnyılyq «Aıattyń» enshisinde — ol Qaraǵandyda jergilikti «Tulpardy» 3:1 esebimen utty.
«Semeı» men «Kaspı» 6 upaımen endi besinshi-altynshy oryndardy bólisti, «Tulpar» 5 upaımen jetinshi orynda, segizinshi orynda 3 upaımen «Elorda» tur, toǵyzynshy — eki machtan keıin 1 upaıy bar oraldyq «Báıterek», ázirge bir de bir upaı jınaı almaǵandar: «Astana», «Shymkent» jáne «Oqjetpes». Jeksenbide, 20 qyrkúıekte tórtinshi týr aıasynda sol juptarda qaıta machtar ótedi, ortalyq kezdesý de Almatyda «Qaırat» pen «Semeı» arasynda bolady.