Qaraǵandy oblysynda eki mektep býhgalterine qatysty sot prosesi aıaqtaldy. Olar uzaq ýaqyt boıy búdjet qarajatyn óz shottaryna júıeli túrde aýdaryp otyrǵan. Olardyń biri zańsyz áreketin 2010 jyly bastaǵan, dep habarlaıdy infohub.kz saıty.
Sot baspasóz qyzmetiniń málimetinshe, Qaraǵandyda aldyn ala sóz baılasqan adamdar tobynyń qyzmettik jaǵdaıyn paıdalanyp, asa iri kólemde aldaý jáne senimdi teris paıdalaný jolymen bóten múlikti jymqyrý týraly qylmystyq is qaraldy. Aıyptalýshylar — mekteptiń býhgalterleri T. jáne N.
Anyqtalǵandaı, 2010 jyldyń qańtarynan 2024 jyldyń maýsymyna deıin T. «№33 jalpy bilim beretin mektep» KMM-niń bas býhgalteri qyzmetin atqarǵan, al N. sol oqý ornynda býhgalter bolyp jumys istegen. Olar qyzmettik jaǵdaıyn paıdalanyp, mektep dırektorlarynyń elektrondyq sıfrlyq qoltańbalaryn zańsyz qoldanyp, búdjet qarajatyn jymqyrýdy júıeli túrde jasaǵan. Sot-ekonomıkalyq saraptama qorytyndysy boıynsha, T. 2010 jyldyń qańtar-jeltoqsan aralyǵynda ústemeaqy, járdemaqy jáne basqa da tólemder degen jeleýmen óz kart-shottaryna negizsiz aqsha aýdarý arqyly 10 658 920 teńgeni, al 2012 jyldyń naýryzynan 2024 jyldyń maýsymyna deıin 192 576 422 teńgeni jymqyrǵan. N. osy kezeńde 113 087 767 teńgeni ıemdengen.
Sot T. men N.-ny kináli dep tanyp, bas bostandyǵynan aıyrý jazasyn taǵaıyndady: T.-ǵa — 6 jyl, N.-ǵa — 7 jyl. Sonymen qatar, sottalǵandarǵa memlekettik uıymdar men kvazımemlekettik sektor sýbektilerinde býhgalter qyzmetin atqarýǵa 5 jyl merzimge tyıym salyndy. Azamattyq talap aıasynda olardan keltirilgen zalal somasy óndirilip, sheshimdi erikti túrde oryndaýǵa alty aı merzim belgilendi. Sondaı-aq sottalǵan T.-nyń jyljymaıtyn múlkine salynǵan tyıym saqtaldy.
Sot alqasy birinshi satydaǵy sottyń úkimin ózgerissiz qaldyrdy.