Qaraǵandyda Sport kúnine oraı Paralımpıada jáne Sýrdlımpıada oıyndarynyń jeńimpazdary men júldegerleri erekshe syılyq — jeke páter kiltterin aldy, dep habarlaıdy infohub.kz saıty.
Alty sportshyǵa páter kiltteri tabystaldy. Jańa qonys ıeleri — Dastan Muqashbekov, Daıana Fedosova, Erkebulan Kanafın, Aıan Ábdirash, Aıjamol Ábdiqatova jáne Aıda Maqatova.
Saltanatty shara Dostyq úıinde ótip, onda sportshylar, jattyqtyrýshylar jáne sala ardagerleri qurmetteldi.
«Búginde Qaraǵandy oblysynyń myńnan astam ókili eldiń ulttyq quramalarynyń qatarynda. Ári qaraı damý úshin biz jekelegen nysandardy salýdan zamanaýı sporttyq orta qurýǵa jáne klasterlik tásilge kóship jatyrmyz. Bul rette sporttyń árkimge qoljetimdi bolýy mańyzdy, sondyqtan ınklúzıvti baǵytqa erekshe kóńil bólemiz. Maqsatymyz — alǵash ret seksıaǵa kelgen baladan bastap, Qazaqstandy iri jarystarda tanystyratyn sportshyǵa deıin barlyǵyna jaǵdaı jasaý», — dep atap ótti oblys ákiminiń orynbasary Álibek Áldeneı.
Sýrdothekvondıst Aıan Ábdirash óz áserimen bólisti. Qazaqstannyń sport sheberi thekvondomen 18 jyl aınalysady. Sýrdlımpıada oıyndarynda ol birneshe ret úzdik atandy — altyn jáne eki qola medal jeńip aldy.
«Maǵan thekvondo sport túri retinde unaıdy. Seksıaǵa ata-anam alyp keldi, qolymnan kele bastady. Qarqyndy jattyqtym, osyndaı qoldaý úshin óte rızynmyn. Oblystyq ákimdik pen dene shynyqtyrý jáne sport basqarmasyna zor alǵysymdy bildiremin», — dedi Aıan Ábdirash.
Sport salasynyń úzdik ókilderi Qurmet gramotalarymen jáne alǵys hattarmen marapattaldy. Bul joly aty shyqqan sportshylar ǵana emes, olardyń ata-analary da atalyp ótti. Sport ardagerleri de quttyqtalyp, olarǵa syılyqtar tabystaldy.