Búgin Qazaqstanda Kaspı teńizi kúni atalyp ótilýde. Dál 20 jyl buryn Kaspı teńiziniń teńiz ortasyn qorǵaý jónindegi negizdemelik konvensıa, ıaǵnı Tegeran konvensıasy kúshine endi. Mereke qarsańynda elimizde «Taza Qazaqstan» ekologıalyq mádenıetin damytý tujyrymdamasy aıasynda «Caspian Sea Action Week 2026» halyqaralyq volonterlik aptalyǵy ótti, dep habarlaıdy infohub.kz saıty.
Aptalyq is-sharalaryna barlyq Kaspı mańy memleketteriniń delegasıalary — Ázirbaıjan, Reseı, Iran jáne Túrikmenstan, sondaı-aq Ózbekstan, Qyrǵyzstan jáne Tájikstan ókilderi qatysty. Olarǵa volonterler, ekologıalyq belsendiler, sarapshylar jáne jastar ókilderi qosyldy.
6 tamyzda aptalyqtyń saltanatty ashylý rásimi ótti, al kelesi kúni ekologıalyq monıtorıńtiń zamanaýı tehnologıalary men Kaspı mańy elderiniń ǵylymı zertteýlerine arnalǵan halyqaralyq semınar men dóńgelek ústel ótti.
Aptalyqtyń basty oqıǵalarynyń biri — 8 tamyzda Aqtaýda ótken «Caspian Clean Challenge» halyqaralyq ekologıalyq marafony. Oǵan ekologıa jáne tabıǵı resýrstar vıse-mınıstri Mansur Oshýrbaev qatysty. Volonterler ploggıng formatynda jaǵalaýdy aýqymdy tazalaý júrgizip, qoqystardy jınap, suryptady, sondaı-aq óńirdiń jasyl tehnologıalary men ekologıalyq bastamalarymen tanysty.
Sol kúni Aqtaýda «Kaspı óńiri volonterleriniń dostyq aleıasy» ashyldy, onda 80-nen astam aǵash otyrǵyzylyp, bolashaq urpaqqa arnalǵan úndeýler salynǵan ýaqyt kapsýlasy qalandy.
9 tamyzda Bozjyra shatqalynda «Bozzhyra Clean Up» aksıasy ótti. Qatysýshylar Mańǵystaýdyń biregeı tabıǵı landshafttarymen tanysyp, shatqal aýmaǵynda ekologıalyq senbilik ótkizdi.
10-11 tamyzda «Caspian Innovation Lab» halyqaralyq hakatony ótti, onyń aıasynda qatysýshylar Kaspı óńiriniń ekojúıesin saqtaý boıynsha jobalardy ázirlep, sarapshylarǵa tanystyrdy. Hakatonmen qatar TED formatynda ashyq mıkrofon ótti, onda ekovolonterler men sarapshylar tájirıbe almasyp, ózekti ekologıalyq máselelerdi talqylady.
Aptalyqtyń qorytyndy is-sharasy 12 tamyzda ótken «Caspian Talks» halyqaralyq volonterler samıti boldy. Ol volonterlik qozǵalys pen sarapshylar qaýymdastyǵynyń ókilderin biriktirdi. Samıt aıasynda hakaton jeńimpazdary marapattalyp, tájirıbe almasý jáne óńirdiń ekologıalyq syn-qaterlerin talqylaý boıynsha paneldik sesıa ótti. Aptalyq saltanatty jabylý rásimimen aıaqtaldy.