Qazaqstan Kólik mınıstrligi áýe kóligimen jolaýshylardy, bagaj ben júkti tasymaldaý erejelerine ózgerister engizý jobasyn ázirledi, dep habarlaıdy infohub.kz saıty.
Jańa erejelerdiń qatarynda — mýzykalyq aspaptardy tasymaldaýdy retteý. Jolaýshylar aspaptardy qol júgi retinde salonǵa ala kire alady, bólek orynǵa ornalastyra alady nemese talaptar saqtalǵan jaǵdaıda bagajǵa tapsyra alady. Salonda dombyra men qobyzdy qorǵanys fýtlárynda alyp júrý múmkindigi bólek bekitilgen. Aspaptyń oramasymen ólshemi 110×35×30 sm-den, salmaǵy 10 kg-nan aspaýy tıis.
Sondaı-aq áýe kompanıalarynyń sharttary saqtalǵan jaǵdaıda úı janýarlaryn salonda tasymaldaý múmkindigin bekitý josparlanýda.
Joba múgedek jolaýshylarǵa jeńildikterdi zańnamalyq turǵydan bekitýdi kózdeıdi jáne ushaqty az syıymdylyqty áýe kemesine májbúrli aýystyrý kezinde ornalastyrý tártibin anyqtaıdy. Tasymaldaýda basym quqyqty áleýmettik osal toptar alady: kámeletke tolmaǵandar, múgedekter, aýyr naýqastar, júkti áıelder men zeınetkerler.
Jeke túzetýler áýe kompanıalarynyń jaýapkershiligin kúsheıtedi: jolaýshyny jetkizý keshiktirilgeni úshin aıyppuldy ótinish berilgen kúnnen bastap 10 kúntizbelik kúnnen aspaıtyn merzimde tóleý merzimin belgileý usynylady. Sondaı-aq tasymaldaýshylardyń kinási dáleldengen jaǵdaıda tirkelmegen bagajdyń búlinýi úshin jaýapkershiligi bolýy múmkin.
Joba «Ashyq NQA» portalynda jarıa talqylaýǵa shyǵaryldy. Múddeli azamattar men uıymdar usynystary men eskertýlerin joldaı alady.