Grýzıada qazaqstandyq azamatqa ózimen birge alyp júrgen dári-dármekke baılanysty uzaq merzimge bas bostandyǵynan aıyrylý qaýpi tónip tur. Oqıǵa sáýir aıynda bolǵan, biraq endi ǵana jarıa boldy. Shýchınsk qalasynyń 44 jastaǵy júrgizýshisi Ivan Chekýlaev Potı portynda kedendik baqylaýdan ótý kezinde ustalyp, odan aýyrsynýdy basatyn dári tabylǵan, dep habarlaıdy infohub.kz.
Er adam Grýzıadan kezekti reısin oryndap jatqanda, keden qyzmetkerleri odan dári tapqan. Ivannyń áıeli Iýlıa Chekýlaevanyń aıtýynsha, bul dárini Germanıadaǵy dáriger arqa aýrýyn emdeý úshin jazǵan. Alaıda onyń qolynda resepti bolmaǵan.
«Biz ony reısten kútip júrmiz, úıge oralǵanyn qalaımyz. Ol óte sabyrly, jaýapty jigit. Ol eshqandaı qylmys jasaı almaıdy. Tek qaǵazy qolynda bolmaǵan, mine, sondyqtan», — dedi júrgizýshiniń áıeli.
Grýzıada bul dári psıhotroptyq jáne esirtki zattaryna jatqyzylǵan, olardyń aınalymy zańmen qatań retteledi. Osyǵan baılanysty qazaqstandyqqa qatysty qylmystyq is qozǵalǵan.
Qazaqstan Syrtqy ister mınıstrligi Chekýlaevqa Grýzıa Qylmystyq kodeksiniń 262-babynyń 1-bóligi boıynsha aıyp taǵylǵanyn rastady. «Bul bap esirtki nemese psıhotroptyq zattardy satý maqsatynsyz zańsyz saqtaý nemese tasymaldaý úshin jaýapkershilikti kózdeıdi. Grýzıadaǵy qazaqstandyq dıplomattar óz quzyreti sheńberinde otandasymyzǵa qajetti konsýldyq-quqyqtyq kómek kórsetýde. Bul másele mınıstrliktiń baqylaýynda», — dep málimdedi QR SİM.
Telearnanyń málimetinshe, kináli dep tanylǵan jaǵdaıda qazaqstandyqqa 15 jylǵa deıin bas bostandyǵynan aıyrylý jazasy qaýip tónip tur.