Qazaqstan quramasy Bratıslavada ótken jastar arasyndaǵy kúres boıynsha álem chempıonatynda medaldar sanaǵynda toǵyzynshy orynǵa ıe boldy. Týrnırge ártúrli elderden 700 jas sportshy qatysyp, grek-rım, erkin jáne áıelder kúresinen 120 júlde jıyntyǵyn sarapqa saldy... dep habarlaıdy infohub.kz.
Jarystyń sońǵy kúninde 74 kelige deıingi salmaqta synǵa túsken erkin kúres sheberi Nurdáýlet Seılbek qola júldeni jeńip aldy. Úshinshi oryn úshin ótken beldesýde ol ıtalıalyq Alessıo Antonıo Perentınany 10:5 esebimen basym tústi.
Seılbek medalǵa jetý jolynda rýmyndyq Katalın Spınany (11:1) jáne túrik Ýmýt Iýslýdy (3:1) tize búktirdi, alaıda jartylaı fınalda amerıkalyq Djeıden Djeımsten (4:13) utylyp qaldy.
Erkin kúrestegi basqa ókilder — Suńqar Seıdahmet (70 kg), Samır Dýrsýnov (97 kg) jáne Rıza Izahar (125 kg) — júldeli beldesýlerge óte almady.
Jalpy Bratıslavada Qazaqstan atynan 30 sportshy synǵa tústi: 20 jigit jáne 10 qyz. Olardyń enshisinde ártúrli dárejedegi bes júlde bar. 67 kelige deıingi salmaqta klasıkalyq kúres sheberi Qyzybek Qalmaǵambetov altyn aldy. Kúmis júldeni erkin kúres sheberi Bekasyl Asambek (61 kg) qorjynǵa saldy. Qola medaldardy Uldana Tileýhan (68 kg), sondaı-aq erkin kúres sheberleri Nurasyl Asambek (57 kg) jáne Nurdáýlet Seılbek ıelendi.
Medaldar sanaǵynda Qazaqstan Armenıamen toǵyzynshy oryndy bólisti. Jeńiske Japonıa quramasy jetti, olar márege reseılikterden ozyp keldi. Úshinshi oryndy AQSh sportshylary aldy.