Qazaqstannyń ishki naryǵynda otandyq qurylys materıaldary óndirýshileriniń úlesi 70%-dan asty, dep habarlaıdy infohub.kz.
Ónerkásip jáne qurylys mınıstrliginde atap ótkendeı, bıyl salany damytýǵa 202,2 mlrd teńge bólinbek. Qurylys salasy eldiń JİÓ-niń 6%-yn quraıdy, al birinshi jartyjyldyqtaǵy qurylys jumystarynyń kólemi 4,1 trln teńgeni qurap, ótken jyldyń sáıkes kezeńimen salystyrǵanda 15,2%-ǵa ósti. 2025 jyly bul kórsetkish 10,7 trln teńgege jetip, 2024 jylmen salystyrǵanda 17,5%-ǵa artty.
Sala damýynyń mańyzdy kezeńi Qurylys kodeksiniń kúshine enýi boldy. Jańa normalar obektilerdi paıdalanýdyń kepildik merzimderin ulǵaıtýdy, jobalaý kezinde seısmıkalyq táýekelderdi mindetti túrde esepke alýdy, qurylys uıymdaryn sıfrlyq baqylaýdy, sondaı-aq buzýshylyqtarǵa jedel den qoıýdy kózdeıdi.
Naryqtyń qurylys materıaldaryna degen qajettiligin 3 myńnan astam kásiporyn qamtamasyz etedi. Mınıstrlikte naqtylaǵandaı: «Bıyl 48 ınvestısıalyq jobany iske asyrý josparlanýda, bul 3,5 myńnan astam jańa jumys ornyn qurýǵa múmkindik beredi». Salada 380 myńnan astam maman eńbek etedi. Qurylysshylar, sáýletshiler, jobalaýshylar men ınjenerlerdiń arqasynda Qazaqstannyń zamanaýı kelbetin qalyptastyratyn aýqymdy jobalar júzege asyrylýda.
Buǵan deıin «Kýrsıv» Qazaqstannyń barlyq óńirinde qurylys quny tómendegenin, biraq sement baǵasy 5%-ǵa óskenin jazǵan bolatyn.