Qazaqstandyq jeńil atletter jankúıerlerdi qýantýdy jalǵastyrýda: Tashkentte ótip jatqan Ortalyq Azıa chempıonatynda olar taǵy eki altyn medal jeńip aldy, dep habarlaıdy infohub.kz.
Jarystyń alǵashqy kúni Ózbekstan astanasynda Alına Chıstákova uzyndyqqa sekirýde 6,10 metr nátıjemen úzdik shyǵyp, eń joǵarǵy satyǵa kóterildi. Bul pánde taǵy bir qazaqstandyq Anastasıa Rypakova (6,09) kúmis aldy. Ol Olımpıada chempıony Olga Rypakovanyń qyzy. Úshtikti Sıngapýrdan kelgen Rozarıo Tıa Lýıza (5,95) túıindedi.
Qazaqstandyq júgirýshi Iýlıa Bashmanova 100 metrge kedergilermen júgirýde 13,75 sekýnd kórsetip, jeńiske jetti. Qolany onyń otandasy Antonına Chernyshova (14,58) alsa, kúmis ózbekstandyq Lıdıa Podsepıkınaǵa (13,84) buıyrdy.
Taǵy bir medaldi Qazaqstan quramasynyń qorjynyna Akbılek Kýralbaı saldy. Ol 3000 metrge kedergilermen júgirýde (10 mınýt 51,59 sekýnd) qola júldeger atandy. Odan tek ózbekstandyqtar Dılshoda Ýsmonova (10:16,12) men Sadafboný Nýsratılloeva (10:39,10) ozyp ketti.
Osylaısha, ashyq Ortalyq Azıa chempıonatynyń alǵashqy kúninde Qazaqstan quramasy úsh altyndy qosa eseptegende jeti medal jeńip aldy. Buǵan deıin naıza laqtyrýshy Ulbolsyn Esirkep eń joǵarǵy satyǵa kóterilgen edi.