Bratıslavada ótip jatqan jastar arasyndaǵy álem chempıonatynda (U20) qazaqstandyq grek-rım kúresiniń balýany Qazybek Kalmagambetov altyn medal jeńip aldy. Fınaldyq beldesýde ol belarýstik Mıhaıl Markovskıdi 13:7 esebimen utty, dep habarlaıdy infohub.kz.
Kalmagambetov fınalǵa deıingi jolda nemis Sebastán Vagnerdi (9:0) senimdi túrde utty. Sodan keıin tóreshilerdiń sheshimimen amerıkalyq Emrın Braıan Natterdi (1:1) jeńdi. Shırek fınalda qazaqstandyq mysyrlyq Mohamed Hasan Ahmed Mohamad Abdelrehımnen (4:1) basym tústi, al jartylaı fınalda 7:5 esebimen vengr Petro Jıtovozdy tize búktirdi. Bul — Qazaqstan quramasynyń týrnırdegi alǵashqy medali, ári tup-týra altyn!
Komandanyń taǵy bir múshesi Marlan Baqaev (72 kelige deıin) qola úshin jubanysh beldesýlerine óte almady. Erasyl Musan (55 keli) men Maksım Ýkraınsev (97 keli) erte kezeńderde jeńilip, medal úshin kúreske ilikpedi.
Aldyńǵy kúni Erkebulan Anapıa (77 keli) qola úshin beldesýde ırandyq Ámir Mahdı Mohammad Saedı Navege 3:5 esebimen ese jiberdi.
Halyqaralyq kúres federasıasynyń (UWW) egıdasymen Slovakıa astanasynda bastalǵan álem birinshiligine planetanyń túkpir-túkpirinen 700-ge jýyq jas sportshy qatysýda. Olar kúrestiń úsh túrinen — grek-rım, erkin jáne áıelder kúresinen — 120 medal jıyntyǵyn sarapqa salady.
Bratıslavada Qazaqstan atynan 30 sportshy — 20 jigit pen 10 qyz — óner kórsetedi. Týrnır 23 tamyzda aıaqtalady.