Almatylyq fırma ırandyq áýekompanıamen yntymaqtastyǵy úshin AQSh Qarjy mınıstrliginiń sanksıalyq tizimine endi, dep habarlaıdy infohub.kz saıty.
AQSh Qarjy mınıstrliginiń saıtynda habarlanǵandaı, Sheteldik aktıvterdi baqylaý basqarmasy (OFAC) Irannyń avıasıa sektoryn qoldaıtyn 36 uıymǵa qarsy sanksıa engizdi. Sonyń ishinde ırandyq Mahan Air áýekompanıasymen yntymaqtasatyn fırmalarǵa da shara qoldanyldy. Máselen, sanksıalyq tizimge qazaqstandyq Tour Invest (Týr Invest) kompanıasy ilindi. Basylymda ol Mahan Air-dyń bas satý agenti bolǵany aıtylǵan.
«Biz Iran rejımine qarjylyq qutqarý jelilerin qamtamasyz etetinderge aýyr zardap bolatynyn ýáde etken edik. Búgin biz bul ýádeni oryndap, Mahan Air-dy qoldaýdy jalǵastyryp otyrǵan kompanıalarǵa sanksıa saldyq. Bul Irannyń qalǵan áýekompanıalarymen bıznes júrgizetinderdiń bárine eskertý bolsyn, biz búgin olardyń barlyǵyna sanksıa saldyq: sizder jahandyq qarjy júıesinen ajyrap qalý qaýpine ushyraısyzdar», — dep eskertti vedomstvoda.
Sonymen qatar OFAC qazaqstandyq týroperatordyń quqyqtyq mártebesin naqtylady — «secondary sanctions risk» (qaıtalama sanksıa qaýpi). Bul tikeleı tyıym salynbaǵanymen, kompanıa joǵary qaýip aımaǵynda ekenin bildiredi.
uchet.kz portalynyń málimetinshe, «Tour Invest (Týr Invest)» JSHS Almatyda tirkelgen. Basshysy — Zıae Babak Alı. «Aq Jaıyq» basylymynyń jazýynsha, kompanıa 2014 jyly týroperator retinde tirkelgen. Bul shtaty bes adamnan az shaǵyn kásiporyn.