Slovakıada jastar arasyndaǵy kúres boıynsha álem chempıonaty jalǵasýda, al kezekti jarys kúni Qazaqstan quramasyna medal ákelmedi. Tórt áıelder salmaq dárejesinde otandyq sportshylar jubanysh beldesýlerine de óte almady, dep habarlaıdy infohub.kz saıty.
Úlken úmit 55 kelige deıingi salmaqta synǵa túsken Shodıena Dılmýratovaǵa artylǵan edi. Shırek fınalda ol ýkraınalyq Karolına Poplavskaıadan 0:6 esebimen utylyp, onyń jalǵasý múmkindigi qarsylasynyń fınalǵa shyǵýyna baılanysty boldy. Alaıda Poplavskaıa búgin sheshýshi beldesýge óte almaı, qola medal úshin kúresedi. Osylaısha, Dılmýratova jubanysh beldesýlerine qatysý quqyǵyn almady.
Týrnırdiń alǵashqy kezeńderinde Jaıdar Muqat (62 kelige deıin), Jangyl Beken (65 kelige deıin) jáne Zeınep Elamas (76 kelige deıin) jarystan shyǵyp qaldy.
Bratıslavadaǵy Qazaqstannyń jalǵyz medali — grek-rım kúresinen 67 kelige deıingi salmaqta top jarǵan Qyzybek Qalmaǵambetovtiń altyny.
Halyqaralyq kúres federasıasynyń (UWW) qoldaýymen ótip jatqan álem birinshiligine Slovakıa astanasyna álemniń túkpir-túkpirinen 700 jas sportshy jınaldy. Olar kúrestiń úsh túrinen — grek-rım, erkin jáne áıelder kúresinen 120 júlde jıyntyǵyn sarapqa salýda.
Bratıslavada Qazaqstan atynan 30 sportshy — 20 jigit jáne 10 qyz óner kórsetýde.
Týrnır 23 tamyzda aıaqtalady.