TikTok arqyly týr satyp alýdan zardap shekken qazaqstandyqtardyń sany júzge jýyqtady. Olar Qara teńiz jaǵalaýynda demalýdy josparlap, aqshasynan aıyrylyp, qazir nesıe ótep júr, dep habarlaıdy KTK telearnasy.
Zardap shekkenderdiń aıtýynsha, olar TikTok-tan Grýzıaǵa arzan saparlar usynatyn týrısik agenttiktiń jarnamasyn kórgen. Perızat Mýsabaeva qurbylarymen birge týrdyń tolyq aqysyn tólegen. Ushýdan bir kún buryn oǵan sapar bolmaıtyny týraly habarlama kelgen.
«Bizge bes jumys kúni ishinde bıletterdi jiberemiz dep ýáde etti. Biraq 19 shilde kúni tańerteń: „Qurmetti týrıser, keshirińizder, meniń kasalyq alshaqtyǵym bar. Sizderdiń aqshalaryńyzben aldyńǵy týrdyń shyǵyndaryn japtym. Sondyqtan sizderdiń týrlaryńyz bolmaıdy, jibere almaımyn“ dep jazdy», — dedi Perızat Mýsabaeva.
Zardap shekkenderdiń málimetinshe, bir sapardyń ortasha quny 500 myń teńgeden bastalǵan. Keıbireýler saıahatty tóleý úshin nesıe nemese bólip tóleý rásimdegen. Biraz týrıser ushýdan buryn-aq týrdyń kúshi joıylǵanyn bilgen, al keıbiri shetelge kelgennen keıin ǵana qıyndyqqa tap bolǵan.
«Keıbireýi shynymen ushyp ketti. Biraq barǵan soń olarda qonaqúı de, tamaq ishetin ne túneıtin oryn da joq ekeni anyqtaldy. Olar jaı ǵana tastap ketilgen», — dedi zardap shekkenderdiń biri Talshyn Abaı.
Aldyn ala baǵalaý boıynsha, jalpy shyǵyn shamamen 15 mıllıon teńgeni quraıdy. Aqshany qaıtarýdyń sátsiz áreketterinen keıin 80 adam polısıaǵa aryzdanǵan. Almaty polısıa departamentinen kúdiktiniń shetelden oralǵan soń áýejaıda ustalǵanyn habarlady.
«Osy fakti boıynsha Qazaqstan Respýblıkasy Qylmystyq kodeksiniń 190-baby 4-bóligi — asa iri mólsherdegi alaıaqtyq boıynsha qylmystyq is qozǵaldy. Kúdikti ýaqytsha ustaý ızolátoryna jabyldy», — dedi Almaty PD resmı ókili Saltanat Ázirbek.
Eger áıeldiń kinási dáleldense, ony 7 jylǵa deıin bas bostandyǵynan aıyrýy múmkin. Bul arada zardap shekkender bolmaǵan demalys úshin aqshany qaıtarýdy talap etýde. Kópshiligi bıyl endi demalysqa shyǵa almaıtynyn moıyndaıdy, óıtkeni sapar úshin rásimdelgen nesıelerin áli de ótep jatyr.