Qazaqstannyń erler basketbol quramasy Japonıadaǵy Azıa oıyndaryndaǵy ónerin merziminen buryn aıaqtady. Aleksandr Lysák jattyqtyratyn komanda úshinshi ret qatarynan jeńilis tapty. Qytaı men Fılıppınnen keıin basketbolshylarymyz Bahreınge 78:101 esebimen jol berip, Oıyndardyń resmı ashylýyna bes kún qalǵanda týrnırden shyǵyp qaldy, dep habarlaıdy infohub.kz saıty.

Natýralızasıalanǵan oıynshylardy tartý tájirıbesinen bas tartý quramamyzdyń oıynyna keri áser etti. Búginde Azıanyń úzdik komandalarynyń deńgeıi qazaqstandyqtarǵa jetpeıdi. Al myqty ortasha komandalardyń ózi bizge shaq kelmeıtinin Azıa kýbogy-2029-dyń irikteý týrnırinde Palestınamen bolǵan oıyn kórsetti.

Qazaqstandyq basketbolshylar Azıa oıyndaryna 1994 jyldan beri qatysyp keledi. 2002 jyly Ońtústik Koreıanyń Pýsan qalasynda ótken Oıyndarda quramamyz qola júlde jeńip alǵan. 1998 jáne 2014 jyldary Qazaqstan basketbolshylary tórtinshi orynǵa turaqtaǵan. Alaıda ol kezder qaıta oralmastaı ketken sıaqty. Al qarjylandyrýdyń basym bóliginen aıyrylǵan «Astana» basketbol klýbynyń aınalasyndaǵy jaǵdaı bizdiń basketbolymyzǵa jaqsylyq ákelmeıdi.

Bahreınmen oıynda Qazaqstanǵa tek jeńis qana jarasatyn. Biraq qarsylastardyń sheteldik legıonerlerimen teń dárejede tek oıyn basynda ǵana oınadyq. Birinshi toqsannyń sońynda bahreındikter 28:15 esebimen alǵa shyǵyp, keıin basymdyqty odan ári arttyra tústi. Qorytyndy esep — 101:78 (28:15, 27:24, 22:17, 24:22).

Qazaqstandyqtar arasynda eń kóp upaı jınaǵan Danııl Severgın — 16 upaı. Anton Bykov 14 upaı saldy. Bahreınniń kóshbasshylary Djakarr Sempson men Mýstafa Rashıd tıisinshe 23 jáne 20 upaı jınady.

Osy ýaqytqa deıin shırek fınalǵa Ońtústik Koreıa, Japonıa, Qytaı, Iran, Qytaılyq Taıbeı, Iordanıa jáne Bahreın quramalary joldama aldy.

AZIA OIYNDARY-2026. Basketbol. Erler. A toby: Ońtústik Koreıa — Saýd Arabıasy 82:66, Japonıa — Indonezıa 98:53, Indonezıa — Ońtústik Koreıa 48:102, Japonıa — Saýd Arabıasy 86:80, Saýd Arabıasy — Indonezıa 100:89, Japonıa — Ońtústik Koreıa 83:100. Orny: 1. Ońtústik Koreıa — 6, 2. Japonıa — 5, 3. Saýd Arabıasy — 4, Indonezıa — 3.

V toby: Iran — Katar 53:59, Iordanıa — Qytaılyq Taıbeı 80:83, Qytaılyq Taıbeı — Iran 69:72, Katar — Iordanıa 65:76, Iran — Iordanıa 81:68, Qytaılyq Taıbeı — Katar 91:69. Orny: 1. Iran — 5, 2. Qytaılyq Taıbeı — 5, 3. Iordanıa — 4, Katar — 4.

S toby: Qytaı — Qazaqstan 99:61, Fılıppın — Bahreın 85:89, Bahreın — Qytaı 59:105, Qazaqstan — Fılıppın 78:109, Bahreın — Qazaqstan 101:78, Qytaı — Fılıppın keıinirek aıaqtalady. Orny: 1. Bahreın — 5, 2. Qytaı — 4, 3. Fılıppın — 3, Qazaqstan — 3.

Oıyndardyń resmı ashylýy 19 qyrkúıekte ótedi. Kelesi kúni erler arasyndaǵy klasıkalyq 5h5 basketboldan fınal men 3-oryn úshin mach oınalady. Sonymen qatar Oıyndar baǵdarlamasynda áıelder arasyndaǵy 5h5 týrnıri, sondaı-aq erler men áıelder arasyndaǵy 3h3 jarystary bar. Barlyq týrnırlerge Qazaqstan ókilderi qatysady.

XX Jazǵy Azıa oıyndary 19 qyrkúıekten 4 qazanǵa deıin Japonıanyń Nagoıa qalasynda ótedi. 45 eldiń sportshylary qatysatyn keshendi jarystarda 460 komplekt medal sarapqa salynady: 217-si — erler, 204-i — áıelder jáne 39-y — aralas razrádtar arasynda. Týrnırler 41 sport túriniń 68 dısıplınasynda ótedi.

Azıada-2026-da Qazaqstan quramasynyń quramynda 571 sportshy óner kórsetedi.