Qazaqstan áıelder basketbol quramasy Azıa oıyndary-2026-da alǵashqy jeńisine qol jetkizdi. Dramalyq sońynda Gonkong komandasyn overtaımda 80:77 (12:10, 17:19, 11:14, 28:25, 12:9) esebimen tize búktirdi. V tobynda úshinshi orynǵa turaqtaǵan qazaqstandyqtar pleı-offqa shyǵý múmkindigin saqtap qaldy, dep habarlaıdy infohub.kz saıty.
Japondarmen 23:88 esebimen oısyraı jeńilgen machtan keıin Borıs Fatkýlın shákirtteri bul joly ábden básekege qabiletti kórindi. Oıyn barysynda kóshbasshylyq kezek-kezek qoldan qolǵa ótip otyrdy.
Tórtinshi toqsanda Gonkong 11 upaıǵa alǵa ketti – negizgi ýaqyt bitýge tórt mınýt qalǵanda 62:51. Alaıda japondardan jaralanǵan qazaqstandyq qyzdardyń namysy oıanyp, olar keremet kambek jasady. Sırena tablony teń eseppen tirkedi – 68:68.
Overtaımda qarsylastardyń úzdiksiz presıńine qarsy dári tapqan qazaqstandyqtar alǵa shyǵyp, jeńisti julyp aldy – 80:77. Bul – aǵymdaǵy Azıadadaǵy alǵashqy jeńis. Bizdiń komanda sapyndaǵy eń nátıjeli oıynshy – 22 upaı jınaǵan qorǵaýshy Anastasıa Alıshaýskaıte.
AZIA OIYNDARY-2026. Basketbol. Áıelder. A toby: Indonezıa – Taıland 61:52, Qytaı – Taıland 111:46, Qytaı – Indonezıa 110:41. Orny: 1. Qytaı – 4, 2. Indonezıa – 2, 3. Taıland – 2.
V toby: Fılıppın – Qazaqstan 88:55, Japonıa – Gonkong 114:37, Fılıppın – Gonkong 90:73, Japonıa – Qazaqstan 88:23, Qazaqstan – Gonkong 80:77 OT. Orny: 1. Japonıa – 4, 2. Fılıppın – 4, 3. Qazaqstan – 4, 4. Gonkong – 3.
S toby: Ońtústik Koreıa – Malaızıa 106:40, Qytaı Taıbeıi – Mońǵolıa 76:67, Ońtústik Koreıa – Mońǵolıa 88:61, Qytaı Taıbeıi – Malaızıa 98:59. Orny: 1. Ońtústik Koreıa – 4, 2. Qytaı Taıbeıi – 4, 3. Mońǵolıa – 2, 4. Malaızıa – 2.
Pleı-offqa úsh toptyń árqaısysynan eki úzdik komanda, sondaı-aq úshinshi oryn alǵan úsh quramanyń ekeýi shyǵady. Osylaısha, úshinshi satyda turǵan qazaqstandyqtardyń shırek fınalǵa shyǵý múmkindigi áli de bar. Bizdiń komandanyń týrnırlik taǵdyry toptyq kezeńniń qorytyndy machtarynyń nátıjelerine baılanysty.
Azıada tarıhynda áıelder basketbolynan altyndy tek úsh el – Qytaı, Ońtústik Koreıa jáne Japonıa jeńip alǵan. Qazaqstan quramasy tórt ret besinshi oryndy ıelendi (1994, 1998, 2014, 2018). Ótken Azıa oıyndarynda qyzdarymyz 12-orynǵa turaqtaǵan, al jeńimpaz qytaılyqtar boldy.
Oıyndardyń resmı ashylýy 19 qyrkúıekte ótti. 45 eldiń sportshylary qatysatyn keshendi jarystarda 460 medal jıyntyǵy sarapqa salynady: 217 – erler arasynda, 204 – áıelder arasynda jáne 39 – aralas razrádtarda. Azıada-2026-da Qazaqstan quramasy sapynda 35 sport túrinen 558 sportshy óner kórsetedi.
Oıyndardyń birinshi kúni qazaqstandyqtar tórt altyn medal jeńip aldy. Oıyndar chempıondary atanǵandar: veloshabandozdar Rınata Sýltanova men Alekseı Lýsenko, sondaı-aq karateshiler Jolaman Bıgabyl men Sofá Berýlseva. Ekinshi kúnnen keıin Qazaqstan beıresmı komandalyq esepte tórtinshi orynda tur.