Qazaqstan quramasy Ekvadorda ótken kadetter arasyndaǵy dzúdodan álem chempıonatynda jeke synda rekordtyq nátıjemen aıaqtady: 10 medal, onyń ishinde úsh altyn, úsh kúmis jáne tórt qola, dep habarlaıdy infohub.kz saıty.
Qazaqstan quramasyna úshinshi altyndy 90 keliden joǵary salmaq dárejesinde óner kórsetken Ádiljan Jaýdınov ákeldi. Fınalda ol Ábdilmanaf Ramazanovpen kezdesip, qosymsha ýaqytta ıpponmen jeńiske jetti. Álemdik reıtıńte tórtinshi orynda turǵan Jaýdınov tıtýlǵa jolda japondyq Koga Terýkı, brazılıalyq Joze Paýlý Pereıra jáne fransıalyq Azrıel Dekenn Dıffodan basym tústi.
Buǵan deıin álem chempıondary atanǵandar: 60 kelige deıingi salmaqta Ǵabıt Rasýlhan jáne 52 kelige deıingi salmaqta Fatıma Sýpygalıeva. Sýpygalıeva osylaısha qyzdar arasyndaǵy álem chempıonatyn jeńip alǵan tuńǵysh qazaqstandyq atandy.
Kúmis medaldardy Ádiljan Nurbeken (50 kelige deıin), Adıa Janahmet (40 kelige deıin) jáne Injý Jumajan (57 kelige deıin) ıelendi. Qola júldegerler: Bekarys Qudaıbergen (50 kelige deıin), Ahmet Baýbek (60 kelige deıin), Erik Ósenov (66 kelige deıin) jáne Erken Bekalı (73 kelige deıin).
Ekvadordaǵy nátıje Qazaqstan quramasy úshin rekordtyq boldy: buǵan deıin ulttyq komanda bir álem chempıonatynda (kadeter, ıýnıorlar nemese eresekter arasynda) 10 medal jáne úsh altyn medal jeńip almaǵan edi. Sonymen qatar, qazaqstandyq dzúdoshylar jeke synnyń úsh kúninde de altyn medalǵa qol jetkizdi.
23 tamyzda álem chempıonaty aralas komandalyq týrnırmen jalǵasady. Jarysqa barlyǵy 59 elden 457 dzúdoshy qatysýda.