Qazaqstannyń munaı óńdeý zaýyttary 2026 jyly AI-92 benzınin Reseı Federasıasyna jóneltken joq. Bul týraly TASS agenttigine Qazaqstan Respýblıkasynyń Energetıka mınıstrligi málimdedi, dep habarlaıdy infohub.kz saıty.
Vedomstvo atap ótkendeı, otyn eksporty tıisti halyqaralyq kelisimderge qol jetkizilgen jaǵdaıda ǵana jáne ishki naryq qajettiligi tolyq qamtamasyz etilgende múmkin bolady.
«Eksporttyq kólemdi iske asyrý tıisti halyqaralyq kelisimderge qol jetkizý, sondaı-aq Qazaqstan Respýblıkasynyń ishki naryǵynyń qajettilikterin sózsiz qamtamasyz etý shartymen júzege asyrylady. Osyǵan baılanysty 2026 jyly Qazaqstan Respýblıkasynyń munaı óńdeý zaýyttarynan AI-92 avtomobıl benzınin Reseı Federasıasyna jóneltý júrgizilgen joq», — dep keltiredi TASS Energetıka mınıstrliginiń habarlamasyn.
Tamyz aıynyń sońynda Reuters saladaǵy tórt derekkózge silteme jasap, iri qazaqstandyq munaı óńdeý zaýyttarynyń shilde-tamyz aılaryna bólingen AI-92 benzınin Reseıge eksporttaý kvotalaryn paıdalanbaǵanyn habarlaǵan bolatyn.
Qazaqstannan benzın shyǵarý kóliktiń barlyq túrimen tyıym salynǵan. Shekteý ishki naryqty qanyqtyrý jáne kórshi elderdegi baǵanyń qymbattyǵy aıasynda otyndy zańsyz shyǵarýdyń jolyn kesý úshin engizilgen edi. Erekshelik tek kólik quralynyń shtattyq bagyndaǵy otynǵa ǵana qoldanylady.
Buǵan deıin «Kýrsıv» 25 tamyzda energetıka mınıstri Erlan Aqkenjenov Qazaqstannan benzınniń resmı eksporty joq ekenin málimdegenin jazǵan. Sonymen qatar ol «otyn týrızmi» dep atalatyn sheńberde shekara arqyly shyǵarylatyn otyn kólemin baǵalaý is júzinde múmkin emes ekenin atap ótken.