Qazaqstanda jasandy ıntellekttiń damýyna baılanysty mektep pánderiniń mazmuny jańartylýda. infohub.kz saıtynyń habarlaýynsha, tıisti ózgeristerdi Oqý-aǵartý mınıstrligi jarıalady.
Vedomstvo tehnologıalardyń qarqyndy damýy, eńbek naryǵy talaptarynyń ózgerýi jáne jasandy ıntellekttiń ómirdiń barlyq salasyna keńinen enýi bilim berý mazmunyn jańartýdy qajet etetinin atap ótti.
«Bul baǵyttaǵy júıeli jumys memleket basshysy Qasym-Jomart Toqaevtyń 2025 jyly ótken Respýblıkalyq tamyz konferensıasynda bergen tapsyrmasyn oryndaý úshin bastaldy. Sol jyldyń qyrkúıeginen bastap jumys kezeń-kezeńimen júrgizilýde. Keıinnen bul jumystyń quqyqtyq negizi nyǵaıtyldy. 2025 jyldyń qarashasynda Qazaqstan Respýblıkasynyń «Jasandy ıntellekt týraly» Zańy qabyldandy, al 2026 jyldyń mamyrynda jasandy ıntellektti orta bilim júıesine engizý jónindegi prezıdent Jarlyǵy shyqty», — dep habarlady mınıstrlikte.
Osy qujattardy iske asyrý aıasynda memlekettik jalpyǵa mindetti bilim berý standarty, úlgilik oqý josparlary men úlgilik oqý baǵdarlamalary jańartyldy. 1-4 synyptardaǵy «Sıfrlyq saýattylyq» páni «Sıfrlyq saýattylyq jáne jasandy ıntellekt» dep, al 5-11 synyptardaǵy «Informatıka» páni «Informatıka jáne jasandy ıntellekt» dep qaıta ataldy.
«Bul tek pán ataýlaryn ózgertý ǵana emes. Jasandy ıntellekt sıfrlyq tehnologıalar men ınformatıkanyń ajyramas bóligine aınaldy. Osyǵan baılanysty pánderdiń mazmunyna jasandy ıntellekt boıynsha jańa bólimder men 43 oqý maqsaty engizildi», — dep atap ótti vedomstvoda.
Búgingi tańda oqýshylar kúndelikti ómirde jasandy ıntellekt quraldaryn qoldanyp júrgeni aıtylýda. Endigi mindet — olardy bul tehnologıany jaı ǵana paıdalanýǵa emes, ony sanaly, tıimdi ári jaýapkershilikpen qoldanýǵa úıretý.
Mınıstrlik oqýshylardy jasandy ıntellektpen qalaı tanystyratynyn aıtty. 1-4 synyptarda «Medıasaýattylyq jáne JI» bólimi aıasynda 17 oqý maqsaty qarastyrylǵan. Oqýshylar kúndelikti ómirdegi qarapaıym mysaldar arqyly jasandy ıntellektpen tanysady, sıfrlyq qaýipsizdik negizderin, jeke derekterdi qorǵaýdy jáne sıfrlyq ortadaǵy jaýapty minez-qulyqty meńgeredi.
5-9 synyptarda «Kompúterlik oılaý jáne baǵdarlamalaý», «Densaýlyq, qaýipsizdik jáne JI» bólimderi aıasynda 14 oqý maqsaty qarastyrylǵan. Oqýshylar oqý prosesinde jasandy ıntellekt quraldaryn tıimdi paıdalanýdy, suranystardy durys qurastyrýdy, alynǵan nátıjelerdi synı turǵydan baǵalaýdy, sondaı-aq kıberqaýipsizdik pen akademıalyq adaldyq qaǵıdattaryn saqtaýdy úırenedi.
10-11 synyptarda «Derekterdi basqarý jáne jasandy ıntellekt» bólimi aıasynda 12 oqý maqsaty qarastyrylǵan. Negizgi nazar jasandy ıntellekttiń jumys isteý prınsıpterin túsinýge jáne ony praktıkalyq qoldanýǵa aýdarylǵan. Oqý mazmunyna mashınalyq oqytý, neırojeliler, derekterdi taldaý jáne qoldanbaly krıptografıa negizderi engizilgen.
Vedomstvo atalǵan pánder boıynsha jańartylǵan oqý baǵdarlamalary ótken oqý jylynda sátti aprobasıadan ótip, oń saraptamalyq qorytyndy alǵanyn atap ótti. Qazir olar belgilengen tártippen bekitý satysynda tur.