Japonıada ótip jatqan Azıada-2026 oıyndarynda qazaqstandyq sportshylar 10 metr qashyqtyqtan pnevmatıkalyq vıntovkadan atý jarysynyń fınalyna óte almady, dep habarlaıdy infohub.kz saıty.
Qurama sapyndaǵy eń úzdik nátıjeni Aleksandra Le kórsetti: irikteý kezeńinde ol 628,5 upaı jınap, 15-orynǵa turaqtady.
Elızaveta Bezrýkova 626,8 upaımen 22-oryndy ıelense, Sofá Shýljenko 624,6 upaımen 28-satydan kórindi. Eske salaıyq, irikteý qorytyndysy boıynsha úzdik segiz sportshy ǵana fınalǵa joldama alatyn.
İrikteý hattamasyn Qytaı sportshysy Van Szyfeı bastady – 636,8 upaı. Ekinshi oryndy Ońtústik Koreıa ókili Ban Hó Djın – 634,9 upaımen alsa, úshinshi satyny Úndistannan kelgen Sonam Ýttam Maskar – 634,1 upaımen túıindedi.
Komandalyq esepte Qazaqstan quramasynyń nátıjesi Le, Bezrýkova jáne Shýljenko kórsetkishterinen quraldy. Bizdiń sportshylar 1879,9 upaı jınap, altynshy orynǵa turaqtady.
Komandalyq jarysta altyndy Qytaı – 1904,2 upaımen jeńip aldy, kúmis Úndistanǵa (1898,0) buıyrsa, qola Japonıaǵa (1897,1) tıesili boldy.
Buǵan deıin 20 qyrkúıekte trıatlonshy Arlan Janabaı qola júlde alyp, Qazaqstanǵa Azıada-2026 oıyndaryndaǵy alǵashqy medalin syılaǵan edi. Keıin velosportshy Rınata Sýltanova jekeleı bólek starttyq jarysta altynǵa qol jetkizdi.
Japonıadaǵy XX Jazǵy Azıa oıyndary keshe, 19 qyrkúıekte resmı túrde ashyldy. 45 eldiń sportshylary qatysatyn keshendi jarystarda 460 medal jıyntyǵy sarapqa salynady: 217-si – erler arasynda, 204-i – áıelder arasynda jáne 39-y – aralas razrádtarda. Týrnırler 41 sport túriniń 68 dısıplınasynda ótedi. Azıada-2026 oıyndarynda Qazaqstan quramasynyń namysyn 559 sportshy qorǵaıdy.