Japonıada ótip jatqan Azıada-2026 oıyndarynda Qazaqstannyń sý dobynan áıelder quramasy Sıngapýr komandasyn 12:7 (2:2, 3:1, 4:3, 3:1) esebimen jeńip, týrnırdi senimdi bastady. Vaterpolo týrnıriniń alǵashqy machy qazaqstandyqtardyń paıdasyna sheshildi, dep habarlaıdy infohub.kz saıty.
Birinshi kezeńniń aıaqtalýyna úsh mınýt qalǵanda bizdiń qyzdar alǵash ret alǵa shyqty — 2:1. Alaıda úziliske deıin Sıngapýr esepti teńestirip úlgerdi. Ekinshi shırekten keıin qazaqstandyqtar 5:3 esebimen alda boldy. Machtyń ekinshi jartysynda chernogorıalyq maman Zoran Maslovardyń shákirtteri basymdylyqty odan ári arttyryp, mańyzdy jeńiske jetti — 12:7. Tórt goldan ortalyq oıynshy Olga Voronsova men komanda kapıtany, draıver Anastasıa Mırshına enshilep aldy.
Azıadanyń áıelder vaterpolo týrnırine alty komanda qatysýda. Jeńimpaz ben júldegerler bir aınalymdyq týrnır qorytyndysy boıynsha anyqtalady. Taǵy erteń qazaqstandyqtar Japonıa quramasymen oınaıdy, ol startta Taılandty 27:7 esebimen oısyrata jeńdi. 22 qyrkúıekte bizdiń qyzdar taılyqtarmen, 23-inde týrnır favorıti Qytaımen jáne 24-inde Ózbekstanmen kezdesedi.
Azıada-2026-da Qazaqstannyń áıelder quramasy sapynda Aleksandra Jarkımbaeva, Alına Ozkaıa, Anastasıa Mırshına, Anastasıa Soı, Anna Novıkova, Valerıa Anosova, Vıktorıa Kaplýn, Dará Pochınok, Elızaveta Rýdneva, Kamıla Naýryzbaeva, Madına Rahmanova, Marıa Martynenko, Mılena Nabıeva, Olga Voronsova jáne Iýlıa Drýjınına óner kórsetedi.
Áıelder arasyndaǵy sý doby týrnıri Azıa oıyndarynda bar-joǵy tórtinshi ret ótkizilip otyr. Buǵan deıingi barlyq jarystarda qytaılyqtar jeńimpaz atanǵan. Qazaqstandyqtar eki ret vıse-chempıon (2010, 2018) jáne eki ret qola júldeger (2014, 2022) boldy.
Japonıadaǵy XX Jazǵy Azıa oıyndary keshe, 19 qyrkúıekte resmı túrde ashyldy. 45 eldiń sportshylary qatysatyn keshendi jarystarda 460 medal jıyntyǵy sarapqa salynady: 217-si erler arasynda, 204-i áıelder arasynda jáne 39-y aralas razrádtarda. Týrnırler 41 sport túriniń 68 dısıplınasynda ótedi.
Azıada-2026-da Qazaqstan quramasynyń sapynda 559 sportshy óner kórsetedi. Búgin qazaqstandyqtar tórt altyn medal jeńip aldy. Oıyndar chempıondary atanǵandar: veloshabandozdar Rınata Sýltanova men Alekseı Lýsenko, sondaı-aq karatıster Jolaman Bıgabyl men Sofá Berýlseva.