Qazaqstan erler tenıs quramasynyń kapıtany Dıas Doskaraev Astanada ótken mach aldyndaǵy baspasóz máslıhatynda Devıs kýbogynyń Álemdik ekinshi tobynyń pleı-off kezeńinde Taılandqa qarsy oıynǵa komandanyń daıyndyǵy týraly aıtty, dep habarlaıdy infohub.kz saıty.
Doskaraevtyń aıtýynsha, Qazaqstan quramasy jeńiske jetýdi jáne álemdik tenıs elıtasyna oralýdy maqsat etip otyr. Sonymen qatar kapıtan komandanyń qarsylasqa baıypty qaraıtynyn jáne jeńil oıyn kútpeıtinin atap ótti.
Baspasóz máslıhatynyń basty taqyryptarynyń biri quramda Aleksandr Býblıktiń bolmaýy boldy. Doskaraev komandany jasaqtaý kezinde tek aldaǵy mach mindetteri ǵana emes, quramanyń uzaq merzimdi perspektıvalary da eskerilgenin túsindirdi.
«Biz Tımofeı Skatovqa senim artyp otyrmyz jáne ol qurama sapyndaǵy tabysty óner kórsetý serıasyn jalǵastyrady dep úmittenemiz. Eger quramǵa Aleksandr Býblık engizilse, ol sózsiz osy oıynda óner kórseter edi, alaıda bul jaǵdaıda Tımofeı Skatovtyń jekeleı razrádta qatysý múmkindigi shekteler edi. Biz tek bir naqty mach týraly ǵana emes, ulttyq komandanyń bolashaǵy týraly da oılaýymyz kerek», — dep túsindirdi Doskaraev.
Kapıtan sondaı-aq jekeleı kezdesýlerde Aleksandr Shevchenko men Tımofeı Skatovtyń kandıdatýralary qarastyrylyp jatqanyn habarlady. Quram boıynsha túpkilikti sheshim oıyn bastalar tusta qabyldanady.
Eske salaıyq, Qazaqstan — Taıland machy 18–19 qyrkúıekte Astanadaǵy Beeline Arena Ulttyq tenıs ortalyǵynyń korttarynda ótedi. Qazaqstan komandasynyń quramyna Aleksandr Shevchenko, Denıs Evseev, Tımofeı Skatov, Beıbit Juqaev jáne Ámir Omarhanov endi.
Oıynnyń jeńimpazy Devıs kýbogynyń Birinshi álemdik tobynda óner kórsetý quqyǵyna ıe bolady.