Japonıada ótip jatqan XX jazǵy Azıa oıyndarynda ústel tenısinen Qazaqstannyń erler juptyq razrádynda Kırıll Gerasımenko men Alan Qurmanǵalıev sátti bastady, dep habarlaıdy infohub.kz saıty.
Ekinshi aınalymda qazaqstandyq jup Iran ókilderi Benámın Faradjı men Arán Gaffarımen kezdesti. Gerasımenko men Qurmanǵalıev 3:1 esebimen jeńiske jetti.
Qazaqstandyqtar birinshi partıany 11:8 esebimen utty, keıin qarsylastar teńdikti qalpyna keltirdi — 7:11. Kelesi eki partıa Gerasımenko men Qurmanǵalıevtiń paıdasyna sheshildi — 11:9, 11:4. Kezdesý 27 mınýtqa sozyldy.
Osylaısha, Qazaqstan ókilderi erler juptyq týrnıriniń kelesi aınalymyna ótip, Azıada medaldary úshin kúresti jalǵastyrady.
Buǵan deıin Gerasımenko men Qurmanǵalıev Qazaqstannyń erler quramasy sapynda komandalyq týrnırde de óner kórsetken. Ulttyq qurama toptyq kezeńnen sátti ótip, Bangladesh (3:0), Sıngapýr (3:1) jáne Laos (3:1) komandalaryn utty.
Qazaqstannyń taǵy bir juby Aıdos Kenjıgýlov pen Sanjar Jubanov Iran tandemine ese jiberip, kelesi aınalymǵa shyǵa almady.
XX jazǵy Azıa oıyndary Japonıanyń Aıchı men Nagoıa qalalarynda ótip jatyr jáne 4 qazanda aıaqtalady.