Qazaqstan voleıbolshy qyzdary Qytaıǵa ese jiberip, Azıada-2026 pleı-offyna ekinshi orynmen shyqty

Qazaqstannyń áıelder voleıbol quramasy Azıa oıyndarynyń qazirgi chempıony — Qytaı komandasyna 0:3 (18:25, 6:25, 14:25) esebimen jol berip, Japonıada ótip jatqan Azıadada V tobynda ekinshi orynǵa turaqtady, dep habarlaıdy infohub.kz saıty.

Bul kezdesýge deıin eki komanda da Fılıppın quramasyn jeńip, shırek fınalǵa joldamasyn qamtamasyz etken bolatyn. Osylaısha, Qazaqstan — Qytaı machynda toptaǵy birinshi oryn taǵdyry sheshildi.

Qazaqstandyq voleıbolshylardyń qarsylastary — úsh dúrkin olımpıada chempıony, eki dúrkin álem chempıony, bes dúrkin Álem kýbogynyń ıegeri, 18 dúrkin Azıa chempıony jáne toǵyz dúrkin Azıa oıyndarynyń jeńimpazy. Qytaılyqtardyń voleıboly ǵaryshtyq deńgeıde ekeni tańǵalarlyq emes.

Ekinshi partıada qarsylastar Asqar Shalkıbekovtiń shákirtterine nebári alty upaı jınaýǵa múmkindik berdi. Birinshi jáne úshinshi setterde qazaqstandyq komanda qarsylyq kórsetýge tyrysty, biraq jergilikti tabystarmen shekteldi.

Qorytyndy — 60 mınýt ishinde 0:3. Qazaqstan topta ekinshi, Qytaı birinshi orynmen márege jetti.

Qytaı men Qazaqstannan bólek pleı-off joldamasyn Japonıa, Indonezıa, Taıland, Qytaı Taıbeıi, Ońtústik Koreıa jáne Vetnam jeńip aldy. Shırek fınal juptary resmı túrde ázirge jarıalanǵan joq. Bul kezeńniń machtary 20 qyrkúıekte ótedi.

AZIA OIYNDARY-2026. Voleıbol. Áıelder.

A toby: Japonıa — Nepal 3:0, Indonezıa — Nepal 3:0. Orny: 1. Japonıa — 3, 2. Indonezıa — 3, 3. Nepal — 0.

V toby: Qytaı — Fılıppın 3:0, Qazaqstan — Fılıppın 3:1, Qytaı — Qazaqstan 3:0. Orny: 1. Qytaı — 6, 2. Qazaqstan — 3, 3. Fılıppın — 0.

S toby: Taıland — Mońǵolıa 3:0, Qytaı Taıbeıi — Qyrǵyzstan 3:0, Qytaı Taıbeıi — Mońǵolıa 3:0, Taıland — Qyrǵyzstan 3:0. Orny: 1. Taıland — 6, 2. Qytaı Taıbeıi — 6, 3. Qyrǵyzstan — 0, 4. Mońǵolıa — 0.

D toby: Vetnam — Katar 3:0, Ońtústik Koreıa — Gonkong 3:0, Ońtústik Koreıa — Katar 3:0, Vetnam — Gonkong 3:0, Gonkong — Katar 3:0. Orny: 1. Ońtústik Koreıa — 6, 2. Vetnam — 6, 3. Gonkong — 3, 4. Katar — 0.

Japonıadaǵy XX jazǵy Azıa oıyndary resmı túrde 19 qyrkúıekte ashylady. 45 eldiń sportshylary qatysatyn keshendi jarystarda 460 medal komplektisi sarapqa salynady: 217-si — erler arasynda, 204-i — áıelder arasynda jáne 39-y — aralas razrádtarda. Týrnırler 41 sport túriniń 68 dısıplınasynda ótedi.

Azıada-2026-da Qazaqstan quramasynyń sapynda 559 sportshy óner kórsetedi.