2026 jylǵy 13 qazannan bastap Qazaqstanda jedel medısınalyq járdem kórsetýdiń jańa erejeleri kúshine endi: endi azamattar brıgadanyń qozǵalysyn kartadan onlaın rejımde baqylaı alady, dep habarlaıdy infohub.kz saıty.
Densaýlyq saqtaý mınıstrliginiń buıryǵyna sáıkes, «Jedel medısınalyq járdem shaqyrý» memlekettik qyzmetin alý úshin qazaqstandyqtar «103» nómirine qońyraý shalýy ne geolokasıasyn kórsetip, mobıldi qosymshalardy — messendjerler men chat-bottardy paıdalanýy qajet.
Brıgada taǵaıyndalǵan soń, medısınalyq uıym pasıentti avtomatty túrde habardar etip, oǵan dárigerlerdiń qozǵalysyn naqty ýaqyt rejıminde baqylaý múmkindigin berýge mindetti.
Sonymen qatar, jedel jaǵdaılardaǵy shaqyrtýlardy jedel járdem stansıalarynyń dıspecherleri emhanalardyń — alǵashqy medısınalyq-sanıtarlyq kómek (AMSK) uıymdarynyń brıgadalaryna jiberedi. Qaıta baǵyttaý emhanalardyń jumys ýaqytynda ǵana isteıdi: jumys kúnderi saǵat 08:00-den 19:00-ge deıin, senbide 08:00-den 12:00-ge deıin. Al emhana dárigerleriniń ózderi mundaı shaqyrtýlardy jumys kúnderi saǵat 08:00-den 20:00-ge deıin oryndaıdy.
Eger jedel shaqyrtý jeksenbide nemese emhanalardyń jumys istemeıtin ýaqytynda tússe, pasıentke jedel járdem stansıasynyń qalypty brıgadasy barady.
Eske salaıyq, 2024 jyldyń kúzinde Densaýlyq saqtaý mınıstrliginiń jedel medısınalyq járdem shaqyrýǵa qatysty jańa túzetýleri tóńireginde janjal týyndaǵan edi. Ol kezde áleýmettik jelilerde brıgadalar shuǵyldyqtyń IV sanatyndaǵy — jeńil jaraqat, joǵary qyzba nemese qan qysymynyń kúrt ózgerýi kezindegi — shaqyrtýlarǵa túnde jáne demalys kúnderi barmaıdy degen aqparat taraǵan bolatyn.
Týyndaǵan qoǵamdyq rezonansqa baılanysty mınıstrlik resmı túsinikteme berýge májbúr boldy. Vedomstvonyń baspasóz hatshysy Aıgerim Orazalıeva buıryq jobasynyń túsindirilýi qate bolǵanyn málimdegen edi. Densaýlyq saqtaý mınıstrligi «103» nómirine qońyraý shalǵanda shaqyrtý sanatyna qaramastan dárigerlik kómek tolyq kólemde kórsetiletinin, al jumys ýaqytynda emhanalardyń mobıldi brıgadalaryn tartý qyzmet jumysynyń jedeldigin arttyrýǵa ǵana baǵyttalǵanyn aıtqan.
Buǵan deıin «Kýrsıv» Qazaqstanda jedel járdem táýligine shamamen 25 myń ótinish qabyldaıtynyn jazǵan bolatyn.