Búgin, 2026 jylǵy 22 tamyzda, Aqtóbede Slovakıada ótken U20 jastar arasyndaǵy álem chempıonatynda altyn medal jeńip alǵan balýan Qazybek Qalmaǵambetov saltanatty túrde qarsy alyndy, dep habarlaıdy infohub.kz saıty.
Aqtóbe oblysy ákimdiginiń resmı Telegram-arnasynda habarlanǵandaı, 67 kelige deıingi salmaq dárejesindegi álem chempıonyn Alıa Moldaǵulova atyndaǵy halyqaralyq áýejaıda ata-anasy, týystary jáne júzdegen jerlesteri qarsy aldy.
Sharada oblystyq týrızm, dene shynyqtyrý jáne sport basqarmasynyń basshysy Meırambek Mahambetov sóz sóıledi. Ol Aqtóbe oblysynyń ákimi Asqat Shaharovtyń usynysy boıynsha tarıhı jeńispen oralǵan sportshyǵa kólik kiltin tabystady.
Qazybek Qalmaǵambetov — Aqtóbe oblysy tarıhyndaǵy U20 sanatynda grek-rım kúresinen álem chempıony atanǵan tuńǵysh sportshy ekeni atap ótildi.
Eske salaıyq, balýan 67 kelige deıingi salmaqta fınalǵa deıin tórt qarsylasyn jeńgen bolatyn. Sheshýshi beldesýde onyń qarsylasy belarýstik Mıhaıl Markovskı boldy. Báseke 13:7 esebimen qazaqstandyqtyń paıdasyna aıaqtaldy.
Osylaısha, 19 jastaǵy Qazybek Qalmaǵambetov 20 jasqa deıingi sanatta álem chempıony atandy.